Onun sözlərinə görə, bu səbəbdən, xüsusilə mövsümü respirator xəstəliklər və viruslardan qorunmaq üçün diqqətli olmaq vacibdir:“Havanın temperaturunun aşağı düşməsi və kəskin soyuqların başlaması ilə bədənimiz daha çox enerji sərf edir və immun sistemi zəifləyə bilər”.
Bu sözləri SİA-ya açıqlamasında pediatr Qoşqar İsmayılov bildirib.
Onun sözlərinə görə, bu səbəbdən, xüsusilə mövsümü respirator xəstəliklər və viruslardan qorunmaq üçün diqqətli olmaq vacibdir:
“İlk növbədə düzgün geyim seçimi önəmlidir. Soyuq havalarda çox qatlı, istiliyi saxlayan geyimlər, papaq, əlcəklər və qalın corablar bədəni qorumağa kömək edir. Eyni zamanda, evdə və iş yerlərində temperaturu normal səviyyədə saxlamaq, rütubəti nisbətən yüksək tutmaq nəfəs yollarını qurutmamaq baxımından faydalıdır.
İmmuniteti gücləndirmək üçün balanslı qidalanmaq, vitamin və minerallarla zəngin qidalar qəbul etmək vacibdir. Xüsusilə C və D vitaminləri, sink və omega-3 yağ turşuları immun sistemini dəstəkləyir. Kifayət qədər maye qəbul etmək, xüsusilə su içmək, bədənin susuz qalmasının qarşısını alır və selikli qişaları qoruyur.
Mövsümü viruslardan qorunmaq üçün əllərin müntəzəm yuyulması, ictimai yerlərdə maska istifadəsi və digər gigiyena qaydalarına riayət etmək önəmlidir. Eyni zamanda, kütləvi tədbirlərdən çəkinmək və xəstə insanlarla yaxın təmasdan uzaq durmaq xəstəlik riskini azaldır.
Fiziki aktivlik də immuniteti gücləndirir. Sadə yürüşlər və evdə edilən yüngül idman hərəkətləri qan dövranını yaxşılaşdırır, bədən istiliyini artırır və xəstəliklərə qarşı müqaviməti yüksəldir.
Soyuq havalarda sağlam qalmaq üçün düzgün geyinmək, qidalanmağa diqqət etmək, gigiyena qaydalarına riayət etmək və aktiv həyat tərzi sürmək əsas prinsiplərdir. Bu sadə, amma effektiv tədbirlər sayəsində mövsümü respirator xəstəliklərin və virusların təsirini əhəmiyyətli dərəcədə azaltmaq mümkündür”.