...Tramp administrasiyası Ukraynadakı müharibənin həlli perspektivlərini ABŞ və Rusiya arasında ticarətin bərpası ilə əlaqələndirir və ümid edir ki, iqtisadi qarşılıqlı asılılıq yeni münaqişələrin qarşısını alaraq, Amerika biznesləri üçün sərfəli imkanlar açacaq.
Lakin Rusiya iqtisadi sektorunda çalışan mütəxəssislər bu strategiyaya şübhə ilə yanaşırlar.
SİA-nın əldə etdiyi məlumata görə, bu barədə Foreign Policy yazır.
Analitiklərin fikrincə, əgər siyasi proseslər Kremlin təhlükəsizlik maraqları ilə ziddiyyət təşkil edərsə, biznes onları dəyişdirməkdə acizdir.
Karnegi Berlin Rusiya və Avrasiya Mərkəzindən Tatyana Stanovaya qeyd edir ki, "Pul Rusiyanın əsas maraqlarını düşündüyündən üstün olmayacaq".
ABŞ-ın Moskva tərəfindən təhdid kimi qəbul edilən istənilən hərəkəti - qoşunların və ya raketdən müdafiə sistemlərinin Avropada yerləşdirilməsi - ticarət əlaqələrindən asılı olmayaraq gərginliyi yenidən alovlandıracaq.
Tarix də göstərir ki, iqtisadi əməkdaşlıq sabitliyə zəmanət vermir.
SSRİ-nin dağılmasından sonra Amerikanın Rusiyaya investisiyaları sürətlə artdı, lakin 2014-cü ildə Krımın ilhaqı Kremllə uzunmüddətli tərəfdaşlığa olan ümidləri puç etdi. Saziş tərəfdarlarının ümid etdiyi Rusiyanın iqtisadi potensialı da şübhə altındadır.
Müharibədən əvvəl ölkənin ÜDM-i İtaliyanınkından kiçik idi və sanksiyalar, hərbi xərclər və texnoloji təcrid inkişafa mane olur.
Hətta hipotetik sülh şəraitində belə, dövlətin resursları uzun müddət ordunun yenidən qurulmasına xərclənməyə davam edəcək.
İnvestisiya mühiti riskli olaraq qalır, siyasi əlaqələri olan əsas oyunçular məhkəmə proseslərinə təsir göstərə və aktivləri ələ keçirə bilirlər.
Amerikalı investor Maykl Kalvinin həbsi buna bariz nümunədir. Buna baxmayaraq, bəzi Tramp müttəfiqləri artıq Rusiya enerjisinə investisiyalar barədə danışıqlar aparırlar. Lakin nüfuz və siyasi risklərdən qorxan əksər Qərb şirkətləri sabitliyin real zəmanətlərini gözləməyə üstünlük verəcəklər.
Əli Babayev