"Azərbaycan və Birləşmiş Ərəb Əmirlikləri parlamentləri arasındakı əlaqələrin inkişaf perspektivlərinin müzakirə edilməsi, iki ölkə arasında siyasi dialoqun və parlament diplomatiyasının güclənməsi baxımından mühüm əhəmiyyət kəsb edir". Bu sözləri SİA-ya açıqlamasında politoloq Yusif Bağırzadə deyib.
Onun sözlərinə görə, bu müzakirələr, təkcə ikitərəfli əlaqələri deyil, həm də beynəlxalq məsələlərdə əməkdaşlığı daha da möhkəmləndirir: "İlk növbədə, bu müzakirələr strateji tərəfdaşlığın dərinləşməsinə xidmət edir. Azərbaycan və BƏƏ arasındakı əlaqələr artıq müxtəlif sahələrdə güclənib və parlamentlərarası əlaqələr bu münasibətlərin siyasi səviyyədə daha da inkişaf etməsinə imkan yaradır. Hər iki ölkənin parlamentlərinin daha yaxın əməkdaşlıq qurması, siyasi və iqtisadi maraqlarını daha effektiv şəkildə müdafiə etmələrinə şərait yaradır. Parlamentlərarası əlaqələr həmçinin, iki ölkə arasında iqtisadi və mədəni mübadilənin dərinləşməsinə də dəstək verir.
Bundan başqa, parlament diplomatiyasının inkişafı, beynəlxalq məsələlərdə hər iki ölkənin mövqeyini möhkəmləndirir. Bu sahədəki əməkdaşlıq, beynəlxalq parlament təşkilatlarında Azərbaycanın və BƏƏ-nin birgə fəaliyyəti üçün yeni imkanlar açır. Parlamentlərarası əlaqələr, yalnız öz ölkələrinin maraqlarını güdməklə yanaşı, həm də regional və beynəlxalq məsələlərdə daha effektiv fəaliyyət göstərmələrinə kömək edir. Məsələn, Azərbaycan və BƏƏ-nin Aralıq Dənizi Parlament Assambleyasının Qadın Parlament Forumunda göstərdiyi fəallıq, onların beynəlxalq arenada daha güclü iştirakını təmin edir.
Eyni zamanda, bu əlaqələr, parlamentlər arasında təcrübə mübadiləsinin və qarşılıqlı təhsil, mədəniyyət sahələrində əməkdaşlığın artırılmasına imkan verir. Azərbaycan və BƏƏ-nin parlamentləri arasında qurulacaq əlaqələr, iki ölkənin qanunvericilik fəaliyyətindəki təcrübə və yanaşmaların mübadiləsini təmin edəcək, bu da qanunvericilik sistemlərinin daha da təkmilləşməsinə xidmət edəcək.
Parlamentlərarası əməkdaşlıq həm də ölkələr arasında sosial və mədəni əlaqələri gücləndirən bir vasitədir. Azərbaycan və BƏƏ-nin mədəni və dini yaxınlıqları, onların xalqları arasında daha dərindən anlayış və əməkdaşlıq yaratmaq üçün böyük imkanlar açır. Bu əlaqələr, həmçinin, regional sabitliyin təmin olunmasına və hər iki ölkənin beynəlxalq münasibətlərdə daha güclü mövqedə olmalarına şərait yaradır".