...Kaliforniya qubernatoru Qevin Nyusom ümid etdiyini bildirib ki, maliyyə bazarının dəyişkənliyi ABŞ prezidenti Donald Trampı Qrenlandiyanın mümkün ilhaqı ilə bağlı rezonans doğuran açıqlamalarından geri çəkilməyə məcbur edəcək.
SİA-nın əldə etdiyi məlumata görə, bu barədə Politico yazır.
O, bu açıqlamanı Trampın Dünya İqtisadi Forumundakı çıxışı ərəfəsində Davosda verib.
Nyusomun sözlərinə görə, bazarın reaksiyası Amerika prezidentinin mövqeyinə təsir edən əsas amil ola bilər.
...Trampı həqiqətən hərəkətə gətirə biləcək yeganə şey bazarlardır. Ümid edirəm ki, o, bu gün cəfəngiyata əlavələr etməz, - deyə qubernator qeyd edib və Trampın əvvəllər bazarın kəskin enişindən sonra tariflərlə bağlı mövqeyini yumşaltdığını xatırladıb.
Nyusom təklif edib ki, səhm qiymətlərinin düşməsi və yaxın ətrafının maraqları nəzərə alınmaqla, Tramp Davosda Avropaya qarşı daha barışdırıcı tonda çıxış edə bilər.
O, vurğulayıb ki, "...bazarlarda baş verənlər birbaşa onun öz portfelinə və onunla birlikdə təyyarədə olan insanların aktivlərinə təsir edir".
Son həftələrdə Tramp Danimarkanın muxtar ərazisi olan Qrenlandiyaya qarşı ritorikasını gücləndirib və adanın ABŞ tərəfindən potensial ilhaqının qarşısını almağa çalışan ölkələrə qarşı ticarət tədbirləri ilə hədələyir.
Bu açıqlamalar Avropa liderləri arasında narahatlıq yaradıb və transatlantik münasibətləri təhlükə altına qoyub.
Nyusom həmçinin Trampla çətin münasibətlərinə toxunaraq, prezidentin faktiki olaraq "Kaliforniyaya müharibə apardığını" iddia edib.
O, Ağ Evin kütləvi meşə yanğınlarından sonra təcili yardım göstərməkdən imtina etməsinin və federal qüvvələrin Los-Ancelesə yerləşdirilməsinin dönüş nöqtəsi olduğunu bildirib. Qubernator vurğulayıb ki, Davosa səfəri Trampa siyasi müqavimət göstərmək cəhdi deyil, əksinə, beynəlxalq auditoriyaya alternativ bir perspektiv çatdırmaqdır.
Əli Babayev