İranda kütləvi etirazlar və ABŞ Prezidenti Donald Trampın İran rejiminə qarşı sərt açıqlamaları fonunda Vaşinqton Yaxın Şərqə təyyarədaşıyan gəmi göndərir.
SİA xəbər verir ki, Fox News bu barədə hərbi mənbələrə istinadən məlumat yayıb.
Onların sözlərinə görə, Amerika hərbi mövcudluğunun artırılması Ağ Evin İrana zərbə endirmək qərarına gələcəyi təqdirdə onun seçimlərini genişləndirmək məqsədi daşıyır. Eyni zamanda, ABŞ hava və quru yolu ilə əlavə qüvvələr yerləşdirməyə, eləcə də raketdən müdafiəni gücləndirməyə hazırlaşır.
Bu addımlar rəsmilərin "qüvvə yaratmaq" prosesinin bir hissəsidir.
Amerika bazalarını və İsraili qorumaq üçün hava hücumundan müdafiə sistemlərinin yerləşdirilməsi planlaşdırılır.
Bir mənbəyə görə, Ağ Ev güc tətbiq etməyi əmr edərsə, bu, ABŞ-ın bölgədəki əvvəlki hərbi əməliyyatlarından "fərqli - daha aqressiv" bir şey tələb edəcək.
Mənbə bildirib ki, Vaşinqton İran rejiminin yaxın günlərdə necə hərəkət etməsindən asılı olacaq bir sıra ssenarilər hazırlayır.
Hazırda Yaxın Şərqdə ABŞ Mərkəzi Komandanlığının məsuliyyət zonasında təxminən 30.000 Amerika əsgəri var. Norfolk və San Dieqo yaxınlığında yerləşən iki əlavə təyyarədaşıyan gəmi hazırda yerləşdirilməyib.
Bu arada, cümə günü jurnalistlərə verdiyi açıqlamada Tramp Fars körfəzi ölkələrinin onu İrana hücum etməkdən çəkindirdiyinə dair media xəbərlərinə münasibət bildirib. Prezidentin sözlərinə görə, heç kim onu İrana hücum etməkdən çəkindirməyə çalışmayıb, amma o, "özünü inandırıb".
Prezidentdən həmçinin İran etirazçılarına yardım göstərmək vədinin qüvvədə olub-olmadığı soruşulub və o, "Baxarıq" cavabını verib.
Əli Babayev