...Rusiyalı dini lider müsəlman icmasını ailə fotosu ilə bağlı futbolçu Məhəmməd Salaha hücum etməyi dayandırmağa çağırıb.
Sverdlovsk Vilayəti Müsəlmanları Ruhani İdarəsinin (Ural Müxtəsibəti) sədri, müfti Artur Muxutdinov, sosial mediada qızlarının Milad ağacının qarşısında şəklini paylaşdıqdan sonra tənqidlə üzləşən misirli Liverpul ulduzunu müdafiə edib.
Müsəlmanlar Milad bayramını qeyd etməsələr də, misirli illərdir davamçılarına xoş bayram arzulayır və bu, bəzilərində mənfi reaksiyalara səbəb olub.
...Ural müsəlmanları üçün Məhəmməd Salah dərin dindar insan hesab olunur. 2018-ci il Dünya Kuboku zamanı o, Yekaterinburqdakı məsciddə namaz qılıb və bizimlə danışıb. Salah təəccüblü dərəcədə təvazökar və əlçatandır. O, müsəlmanlar da daxil olmaqla yüz minlərlə idmançı üçün mənəvi kompasdır.
SİA-nın məlumatına görə, Muxutdinov bunu RİA Novosti-yə bildirib.
Müfti vurğulayıb ki, oyunçunun real hərəkətləri müvəqqəti səs-küydən daha vacibdir.
...Ailəsinin şəkli ətrafındakı hay-küy çox tez unudulacaq, amma yaddaşlarda Salahın maddi köməyi qalacaq. Futbolçunun pulu ilə doğma kəndində tikilmiş xəstəxana, məktəb, idman qurğuları və su təmizləyici qurğu - bütün bunlar xalqa xidmət edir, - deyə o qeyd edib.
Müfti dindaşlarına müraciət edərək sərt tənqidin dini prinsiplərlə uyğunsuzluğuna diqqət çəkib.
...Salahı tənqid edən dindaşlarımızı aqressivliklərini azaltmağa çağırıram; bu, dini prinsiplərə uyğun deyil. Biz Allahdan qorxmalı və hər birimizin xətrinə dəyə biləcək sözləri boş yerə sərf etməməliyik, - deyə Muxutdinov bildirib. O, əlavə edib ki, müsəlmanlar bir-birlərinə hörmətlə yanaşmalı və nifrəti qızışdırmamalıdırlar.
Əli Babayev