...İnsanın fiziki göstəriciləri 35 yaş ətrafında zirvəyə çatır və bundan sonra tədricən azalmağa başlayır. Bu nəticəyə alimlər çoxillik tədqiqatdan sonra gəliblər və bu tədqiqatda da fiziki fəaliyyətə başlamağın istənilən yaşda faydalı olduğu göstərilib.
SİA-nın əldə etdiyi məlumata görə, bu barədə Independent yazır.
Tədqiqatçılar qeyd edirlər ki, 35 yaşdan sonra dözümlülük, güc və əzələ göstəriciləri azalmağa başlayır və sonrakı həyatda bu, insanın müstəqil həyat sürmə qabiliyyətinə təsir göstərə bilər.
Əvvəllər bu cür nəticələr müəyyən yaş qruplarını əhatə edən təcrid olunmuş tədqiqatlara əsaslanırdı.
İsveçdə aparılan yeni bir tədqiqat özünəməxsus müddəti ilə seçilir. Alimlər 1958-ci il təvəllüdlü 400-dən çox kişi və qadını 47 il ərzində izləyiblər.
Onların fiziki hazırlığı və gücü 16 yaşdan 63 yaşa qədər müntəzəm olaraq qiymətləndirilib. Nəticələr göstərdi ki, fiziki göstəricilərdə azalma məşq səviyyəsindən asılı olmayaraq 35 yaşında başlayır.
Bu proses yaşla sürətlənir. Orta hesabla, 63 yaşa qədər ümumi fiziki göstəricilər 30-48 faiz azalır.
Lakin kişilər və qadınlar arasında heç bir fərq aşkar edilməyib. Bu tapıntılar peşəkar idmançıların tədqiqatları da daxil olmaqla, əvvəlki tədqiqatların nəticələrini dəstəkləyir. Tədqiqatçılar qeyd edirlər ki, fiziki hazırlığın erkən azalması, xüsusən də oturaq həyat tərzi sürən insanlarda, həyatın sonrakı dövrlərində klinik cəhətdən əhəmiyyətli pozğunluqlara səbəb ola bilər. Eyni zamanda, tədqiqat istənilən yaşda fiziki fəaliyyətin faydalarını vurğulayır. Yetkinlik dövründə müntəzəm olaraq idman etməyə başlayan iştirakçılar performanslarını 5-10 faiz yaxşılaşdıra biliblər.
...Fiziki fəaliyyət, tamamilə geri qaytarıla bilməsə belə, performansın azalmasını yavaşlada bilər, - deyə tədqiqatın aparıcı müəllifi Maria Vesterstol qeyd edib.
Tədqiqatçılar yaşla bağlı dəyişikliklərin mexanizmlərini və həyat tərzinin fiziki sağlamlığa təsirini daha yaxşı başa düşmək üçün iştirakçıları izləməyə davam etməyi planlaşdırırlar.
Əli Babayev