...Donald Tramp administrasiyası, Vladimir Putinin ABŞ tərəfindən hazırlanmış sülh planını qəbul etməkdən imtina edəcəyi təqdirdə ona təzyiqi artırmaq üçün Rusiyanın enerji sektoruna qarşı yeni sanksiyalar hazırlayır.
SİA-nın əldə etdiyi məlumata görə, bu barədə The Moscow Times yazır.
Bloomberg-in vəziyyətlə tanış mənbələrə istinadən verdiyi məlumata görə, yeni sanksiyalar gələn həftənin əvvəlində tətbiq oluna bilər.
Bunlar "kölgə donanması" gəmilərinə, eləcə də Rusiyanın alıcılara neft daşımaq üçün istifadə etdiyi ticarət şirkətlərinə təsir edəcək.
Agentliyin mənbələrinə görə, Trampın sülh planı əsas məsələlərdə həll olunmayıb. Kremlin bütövlükdə tələb etdiyi Donbasın taleyi, eləcə də Zaporojye Atom Elektrik Stansiyasının və Avropadakı dondurulmuş Rusiya aktivlərinin gələcəyi ilə bağlı fikir ayrılıqları qalmaqdadır.
Sülh planına həmçinin Rusiyanın əvvəllər qəti şəkildə rədd etdiyi təklif olan Ukraynada Avropa qoşunlarının yerləşdirilməsi də daxildir.
Bloomberg mənbələri bildirib ki, Putinə təzyiq göstərmək üçün sanksiyalar barədə qərar hələ verilməyib və bu, Donald Trampdan asılıdır. ABŞ-ın oktyabr ayının sonunda tətbiq etdiyi əvvəlki sanksiyalar Rusiyanın iki ən böyük neft şirkəti olan “Rosneft” və “Lukoil”-a təsir etmişdi.
Onların qara siyahılara daxil edilməsi Rusiya neft ixracını iflic etməmişdi; əksinə, Rusiya neftinin qiyməti kəskin şəkildə aşağı düşmüşdü.
Argus-un məlumatına görə, dekabrın ortalarında Baltik dənizi limanlarında Urals neftinin bir bareli 40,10 dollara, Qara dənizdən daşınarkən isə 38 dollara satılırdı.
Sber analitiklərinin fikrincə, Urals neftinin Brent neftinə nisbətən endirimləri bir barel üçün 24-26 dollara çatıb və Brent neftinin qiyməti COVID pandemiyasının qlobal miqyasda tüğyan etdiyi 2020-ci ildən bəri ən aşağı səviyyəyə düşüb.
İki ay ərzində Urals neftinin endirimləri ikiqatdan üçqata qədər artıb və qiyməti 28 faiz azalıb.
Əli Babayev