...“El Poyo” kimi tanınan keçmiş Venesuela hərbi kəşfiyyat rəisi Uqo Karvaxal, Nikolas Maduro rejiminin effektiv şəkildə narko-terror təşkilatı kimi fəaliyyət göstərdiyini iddia edib.
Bu, Karvaxalın ABŞ federal həbsxanasından ABŞ prezidenti Donald Trampa göndərdiyi məktubda bildirilib.
SİA-nın əldə etdiyi məlumata görə, bu barədə Euronews yazır.
Karvaxal iddia edir ki, xidməti dövründə yüksək vəzifəli Venesuela rəsmilərinin narkotik daşınmasını əlaqələndirdiyini və silahlı qruplarla əməkdaşlıq etdiyini şəxsən müşahidə edib. Məktubda Kolumbiya FARC və ELN üsyançıları, Kuba kəşfiyyat agentlikləri və hətta Hizbullah yaraqlıları ilə əlaqələrdən bəhs olunur.
O, bu ittifaqların ABŞ-a kokain qaçaqmalçılığı və siyasi əməliyyatları maliyyələşdirmək üçün istifadə edildiyini iddia edir.
Karvaxal həmçinin Venesuela hökumətini genişmiqyaslı casusluqda, dezinformasiyada və seçki manipulyasiyasında, xüsusən də Smartmatic elektron səsvermə sistemi vasitəsilə ittiham edib.
O, ABŞ hakimiyyəti ilə əməkdaşlıq etməyə və əlavə sübutlar təqdim etməyə hazır olduğunu bildirib. Məktubun dərc olunması Vaşinqtonun Karakasa təzyiqinin kəskin artması ilə üst-üstə düşdü.
ABŞ dövlət katibi Marko Rubio Maduronun sistematik şəkildə öhdəliklərini pozduğunu və ABŞ-ın onun vədlərinə etibar edə bilməyəcəyini bildirib.
Karvaxal keçmiş prezident Huqo Çavesin rəhbərliyi altında Venesuelanın hərbi əks-kəşfiyyatına rəhbərlik edib, lakin 2019-cu ildə müxalifətə keçib. 2023-cü ildə o, ABŞ-a ekstradisiya edilib və orada beynəlxalq narkotik qaçaqmalçılığında iştirak və FARC terror təşkilatı ilə əməkdaşlıq ittihamları ilə üzləşir.
Əli Babayev