...Aİ Şurası və Avropa Parlamenti 2026-cı ilin sonuna qədər Rusiya mayeləşdirilmiş təbii qazının (LNG) idxalına, 2027-ci ilin payızına qədər isə boru kəməri qazının idxalına mərhələli şəkildə qadağa qoyulmasını nəzərdə tutan qayda barədə razılığa gəliblər.
SİA-nın əldə etdiyi məlumata görə, Avropa İttifaqı Şurasının mətbuat xidməti bu barədə 3 dekabrda məlumat verib.
Aİ və Avropa Parlamentinin nümayəndələri Rusiya təbii qazının idxalından mərhələli şəkildə imtina edilməsini nəzərdə tutan qayda barədə ilkin razılığa gəliblər.
Bu sənəd, Rusiya qaz təchizatından Avropa enerji bazarında siyasi vasitə kimi istifadə etməyə başladıqdan sonra Rusiyanın enerji ehtiyatlarından asılılığın aradan qaldırılmasına yönəlmiş REPowerEU planının əsas elementidir.
Qayda, Rusiyadan həm mayeləşdirilmiş təbii qazın (LNG), həm də boru kəməri qazının idxalına hüquqi cəhətdən məcburi və tədricən qadağa qoyur.
LNG-yə tam qadağa 2026-cı ilin sonunda, boru kəməri qazına isə 2027-ci ilin payızında qüvvəyə minməsi planlaşdırılır. Mövcud müqavilələr üçün keçid dövrü müəyyən edilib və bu cür müqavilələrdə dəyişikliklərə yalnız texniki səbəblərdən icazə veriləcək, təchizat həcminin artırılması mümkün olmayacaq.
Bundan əlavə, keçid dövründə Rusiya qazı və təchizatının idxalına yalnız müvafiq təsdiq alındıqdan sonra icazə veriləcək.
Aİ-yə əhəmiyyətli ixrac həcmi olan müəyyən təchizatçı ölkələr üçün istisnalar tətbiq edilib.
Bundan əlavə, qaydalar uyğunsuzluğa görə cərimələr nəzərdə tutur və Aİ-nin ayrı-ayrı üzv dövlətlərinin enerji təhlükəsizliyinə ciddi təhdid yarandıqda idxal qadağalarının müvəqqəti dayandırılmasına imkan verir.
Bu, yalnız müstəsna hallarda, qısa müddətə və yalnız qısamüddətli müqavilələr üçün mümkündür.
Əli Babayev