“Nazirliklərin mümkün birləşdirilməsi idarəetmədə səmərəliliyi artıra bilər” - EKSPERT

"Bir sıra nazirliklərin birləşdirilməsi və vahid qurum kimi fəaliyyət göstərməsi ehtimalı gündəmdədir. Belə struktur dəyişikliklərinin məqsədi dövlət idarəçiliyinin optimallaşdırılması, resurslardan daha səmərəli istifadə və qərarların daha çevik şəkildə verilməsi ola bilər. Dünyanın müxtəlif ölkələrində bu tip konsolidasiya prosesləri zaman-zaman həyata keçirilir və müəyyən üstünlüklər qazandırır". Bu sözləri SİA-ya açıqlamasında beynəlxalq ekspert Anar Əliyev deyib.

Onun sözlərinə görə, nazirliklərin birləşdirilməsi idarəetmədə paralelliyin və təkrarlanan funksiyaların aradan qaldırılmasına imkan verir: "Hazırda ayrı-ayrı nazirliklərin fəaliyyət sahələri kəsişdiyi üçün koordinasiya problemi, bürokratik ləngimələr və resurs itkisi müşahidə oluna bilir. Vahid struktur altında bu sahələr daha sistemli şəkildə işləyə, qərarlar daha sürətli qəbul edilə bilər. Digər üstünlük dövlət büdcəsinə qənaətdir. Bir sıra inzibati aparatların, departamentlərin və idarəetmə xərclərinin azaldılması dövlətin maliyyə yükünü yüngülləşdirə bilər. Dövlət resurslarının optimallaşdırılması həm iqtisadi səmərəlilik, həm də şəffaflıq baxımından mühüm addımdır.

Nazirliklərin konsolidasiyası həm də milli siyasətlərin vahid xətt üzrə formalaşmasına şərait yaradır. Xüsusilə sosial, iqtisadi və innovasiya sahələri bir-biri ilə sıx bağlı olduğu üçün bu istiqamətlərin vahid strategiya çərçivəsində idarə olunması daha effektiv nəticələr verə bilər. Məsələn, iqtisadiyyat-innovasiya, təhsil-gənclər-sosial siyasət və ya ekologiya-təbii sərvətlər istiqamətində vahid qurumların yaradılması siyasətlərin uzlaşmasını gücləndirə bilər.

Bundan başqa, islahatların psixoloji və institusional təsiri də nəzərə alınmalıdır. Strukturlararası rəqabət və məsuliyyət bölgüsünün daha aydın olması iş prosesinin keyfiyyətini artırır. Yeni qurum daxilində kadr və idarəetmə islahatları aparılması da əlavə üstünlüklər yarada bilər. Lakin istənilən birləşmənin effektiv olması üçün iki vacib şərt var: düzgün planlaşdırma və mərhələli tətbiq. Əks halda, struktur dəyişikliyi müvəqqəti xaos, uyğunlaşma çətinlikləri və idarəetmədə boşluqlar yarada bilər. Ona görə də, proses yalnız funksional təhlil və səmərəlilik ölçmələrinə əsaslanmalıdır.

Ümumilikdə, nazirliklərin ehtimal birləşdirilməsi idarəetmədə səmərəlilik, çeviklik və resursların daha rasional istifadəsi baxımından müsbət nəticələr verə bilər. Əsas məsələ bu prosesin düşünülmüş strategiya əsasında, cəmiyyət və dövlət maraqları çərçivəsində həyata keçirilməsidir".