...Fransadakı Pasteur İnstitutunun Tənəffüs Yoluxucu Xəstəliklər Mərkəzinin direktoru Mari-Ann Ramey-Velti xəbərdarlıq edir ki, dünya COVID-19 pandemiyasını miqyası və şiddəti baxımından üstələyəcək quş qripi pandemiyası ilə üzləşə bilər.
SİA-nın məlumatına görə, bu barədə Reuters yazır.
...Yüksək patogenli H5 virusu artıq yüz milyonlarla quşun kütləvi ölümünə, qida təchizatı zəncirlərinin pozulmasına və qiymətlərin artmasına səbəb olub.
Lakin insanlara yoluxma halları nadir olaraq qalır və yoluxmuş heyvanlarla sıx təmasla əlaqələndirilir.
Əsas təhlükə virusun insandan insana ötürülməsinə imkan verəcək mümkün mutasiyasıdır.
Ramey-Velti bildirib ki, “...biz virusun məməlilərə, xüsusən də insanlara uyğunlaşacağından və insandan insana ötürüləcəyindən və bu virusun pandemiyaya çevriləcəyindən qorxuruq”.
Əsasən həssas qruplara təsir edən koronavirusdan fərqli olaraq, qrip virusları hətta uşaqlar da daxil olmaqla sağlam fərdlərdə belə ağır xəstəliklərə səbəb ola bilər.
Ümumdünya Səhiyyə Təşkilatının (ÜST) məlumatına görə, 2003-cü ildən 2025-ci ilə qədər Misir, İndoneziya və Vyetnam kimi ölkələrdə quş qripinə təxminən 1000 yoluxma halı qeydə alınıb ki, bunların 48 faizi ölümcül olub. Bu yaxınlarda Vaşinqton ştatında H5N5 virusunun ilk ölümcül insan halı qeydə alınıb.
Buna baxmayaraq, hazırda pandemiya riski aşağı hesab olunur.
Ümumdünya Heyvan Sağlamlığı Təşkilatının elmi şöbəsinin müdiri Qreqorio Torres qeyd edib ki, “...pandemiya riski mövcuddur, lakin ehtimal azdır. Meşədə təhlükəsiz gəzə, toyuq və yumurta yeyə və həyatdan zövq ala bilərsiniz”. Mütəxəssislər vurğulayırlar ki, dünya COVID-19 pandemiyasından daha yaxşı bu təhlükəyə hazırdır. Peyvənd prototipləri artıq hazırlanıb, antiviral dərman ehtiyatları toplanıb və dərmanların sürətli istehsalı üçün texnologiyalar təkmilləşdirilib.
Nazlı Almuradova