...Yakutiyanın büdcəsində Ukraynaya qarşı müharibədə iştirak edənlər üçün vəsait tükənib.
SİA-nın məlumatına görə, bunu respublikanın maliyyə naziri İvan Alekseyev Saxa televiziya kanalında bildirib.
Onun sözlərinə görə, müqaviləli əsgərlərə ödənişlər müvəqqəti olaraq dayandırılıb.
...Təəssüf ki, həqiqətən də vəziyyət belədir, - deyə Alekseyev etiraf edib və əlavə edib ki, bunun səbəblərindən biri hakimiyyət orqanlarının "nə qədər insanın ödənişə ehtiyacı olacağını əvvəlcədən hesablaya bilməməsidir".
O, həmçinin problemin "yaxın günlərdə" həll olunacağına əminlik verib.
"The Moscow Times" qəzetinin məlumatına görə, regional büdcə Müdafiə Nazirliyi ilə müqavilə imzalandıqda, yaralanma və hərbçinin ölümü halında birdəfəlik ödənişlər üçün vəsait ayırır.
Şərq Hərbi Dairəsinin hərbi-siyasi işlər üzrə komandir müavini general-leytenant Roman Qrekovun sözlərinə görə, 2024-cü ilin sonuna qədər Ukraynaya qarşı müharibədə 8000-dən çox yakutiyalı vuruşub.
İctimaiyyətə açıq məlumatlar göstərir ki, 20 noyabr tarixinə qədər respublikanın ən azı 1954 sakini cəbhə xəttində həlak olub.
May ayında Yakutiya hakimiyyəti hərbi xidmət üçün regional birdəfəlik ödənişi 500.000 rubl artırıb.
2025-ci il dekabrın 31-dək ən azı bir il müddətinə müqavilə bağlayanlar üçün bu məbləğ hazırda 1,8 milyon rubl təşkil edir. Bələdiyyə rayonlarından və şəhər ərazilərindən minimum birdəfəlik ödəniş də 400.000 rubla qədər artırılıb.
İlin birinci yarısında Yakutiya 24,4 milyard rubl təşkil edən əhəmiyyətli bir büdcə kəsiri ilə üzləşib ki, bu da təsdiq edilmiş illik 2,8 milyard rubl məbləğindən təxminən on dəfə çoxdur.
Respublikanın dövlət borcu 26,5 faiz artaraq 69,8 milyard rubla çatıb. 2026-cı il üçün büdcə layihəsində gəlirlər 309,7 milyard rubl, xərclər 317,3 milyard rubl və kəsir 7,5 milyard rubl nəzərdə tutulub.
Büdcə problemləri səbəbindən respublika hökuməti Ukraynada həlak olan əsgərlərin ailələrinə əvvəllər 1,1 milyon rubl təşkil edən regional ödənişləri ləğv edib.
Region rəhbəri Valentin Konovalovun sözlərinə görə, 2024-cü ildə Xakasiya hökuməti müharibə veteranlarına maliyyə yardımı üçün təxminən 600 milyon rubl ayırıb.
Bu il bu məbləğ 287 milyon rubla düşüb.
Xakasiyanın gələn il üçün büdcə kəsiri 7,07 milyard rubl təşkil edir.
Regional maliyyə naziri İqor Tuqujekov gəlirlərin planlaşdırılandan aşağı olacağından və bu fərqi daha da artıracağından narahatlığını bildirib.
...Və avqust ayında Sankt-Peterburq hökuməti könüllülər üçün 1,6 milyon rublluq müqavilə bonusunu ləğv edib.
Əli Babayev