...Özlərini və partnyorlarını romantik baxımdan eyni dərəcədə cəlbedici hesab edən insanlar daha xoşbəxt və daha sabit münasibətlər barədə məlumat verirlər. Bu, beynəlxalq alimlər qrupunun gəldiyi nəticədir.
SİA-nın məlumatına görə, tədqiqat "Evolutionary Psychological Science" (EPS) jurnalında dərc edilib.
Təkamül psixologiyasında bu xüsusiyyət "partnyor dəyəri" adlanır - insanın potensial partnyor kimi ümumi cəlbediciliyi, o cümlədən görünüş, sağlamlıq, yumor hissi və digər keyfiyyətlər.
Əvvəllər yüksək partnyor reytinqlərinin münasibət məmnuniyyəti ilə əlaqəli olduğu məlum olsa da, partnyor dəyərindəki fərqlərin təsiri qeyri-müəyyən olaraq qalıb.
İki tədqiqatda tədqiqatçılar ABŞ-da 454 tələbə və İsraildə 1764 yetkin arasında sorğu keçiriblər.
İştirakçılar özlərinin və partnyorlarının cəlbediciliyini anket vasitəsilə qiymətləndiriblər və həmçinin münasibət məmnuniyyətini, öhdəlik səviyyəsini, münasibəti davam etdirmək istəyini və alternativlər haqqında qavrayışları ölçən şkalaları doldurublar.
Təhlil aydın bir tendensiya ortaya qoyub: hər iki partnyorun cəlbedici hesab edildiyi cütlüklər ən yüksək münasibət məmnuniyyəti və öhdəlik nümayiş etdiriblər.
Müəlliflər qeyd ediblər ki, insanın öz cəlbediciliyi haqqında təsəvvürləri yaş, təcrübə və mədəni kontekstlə dəyişir və bu amillər "dəyər"dəki fərqlərin narahatlıq mənbəyinə çevriləcəyini və ya əksinə, münasibətləri gücləndirəcəyini müəyyən edə bilər.
Nazlı Almuradova