“YAP Azərbaycanın siyasi sistemində dayanıqlı liderlik və idarəçilik rolunu möhkəmləndirib” - ŞƏRH EDİLDİ

"Yeni Azərbaycan Partiyasının (YAP) yaranmasından 33 il ötür. Bu müddət ərzində partiyanın dövlət idarəçiliyində və siyasi sistemin formalaşmasında əsas rolunu müəyyən edən bir neçə amil diqqət çəkir. YAP güclü mərkəzləşdirilmiş struktur və təşkilati disiplin sayəsində siyasi qərarların sürətli və effektiv qəbulunu təmin edib". Bu sözləri SİA-ya açıqlamasında ekspert Emin Həsənli deyib.

Onun sözlərinə görə, xüsusilə Azərbaycanın müstəqilliyinin ilk illərində dövlət quruculuğu və sabitlik prosesində mühüm rol oynayıb: "Partiyanın dövlət idarəçiliyindəki təsirini gücləndirən ikinci amil onun strateji ideoloji platformasıdır. YAP milli maraqları, suverenlik prinsiplərini və iqtisadi inkişaf prioritetlərini əsas götürərək uzunmüddətli proqramlar hazırlayıb. Bu proqramlar həm iqtisadi siyasət, həm də sosial sahədə həyata keçirilən layihələrlə dəstəklənib və ölkənin davamlı inkişafını təmin edən çərçivə rolunu oynayıb. YAP-ın siyasi və sosial konsensus yaratmaq qabiliyyətidir. Partiya müxtəlif ictimai qruplar, regionlar və sosial təbəqələrlə münasibətlər quraraq, geniş ictimai dəstək təmin edib. Bu, həm siyasi sabitliyi gücləndirir, həm də dövlət qərarlarının effektivliyini artırır.

Gələcəkdə YAP-ın siyasi strategiyası ölkənin inkişaf gündəminə bir neçə istiqamətdə təsir göstərə bilər. Əvvəlcə, partiya iqtisadi diversifikasiya, rəqəmsal transformasiya və regionların bərpası kimi strateji layihələri dəstəkləyərək Azərbaycanın inkişaf tempini sürətləndirə bilər. İkincisi, xarici siyasətdə balanslı və çoxvektorlu yanaşmanın qorunması, enerji və nəqliyyat dəhlizlərinin inkişafı ölkənin regional mövqeyini gücləndirəcək. Üçüncüsü, sosial siyasət və təhsil sahəsində islahatlar uzunmüddətli insan kapitalının formalaşmasına töhfə verəcək, bu da ölkənin dayanıqlı inkişafını təmin edəcək. YAP Azərbaycanın siyasi sistemində dayanıqlı liderlik və idarəçilik mexanizmini formalaşdırıb və gələcəkdə də ölkənin iqtisadi, sosial və siyasi inkişafını istiqamətləndirən əsas güc olaraq qalacaq".