"YAP-ın fəaliyyəti ölkədə siyasi sabitlik və dövlətçilik modelinin formalaşmasına xidmət edir" - DEPUTAT ŞƏRH ETDİ

"Yeni Azərbaycan Partiyasının (YAP) yaranmasından 33 il keçməsi onun ölkənin siyasi sistemində və dövlət idarəçiliyində aparıcı qüvvəyə çevrildiyini göstərir. Bu dövr Azərbaycanın dövlətçilik modelinin möhkəmləndiyi, siyasi sabitliyin formalaşdığı bir mərhələ kimi xarakterizə olunur". Bu sözləri SİA-ya açıqlamasında millət vəkili Jalə Əliyeva deyib.

Onun sözlərinə görə, partiyanın əsas rolunu müəyyən edən amillər arasında Ulu Öndər Heydər Əliyevin siyasi kursuna sadiqlik, dövlət institutlarının möhkəmləndirilməsi və cəmiyyətdə etimadın formalaşması önəmli yer tutur. YAP-ın uzunmüddətli siyasi sabitliyi və institusional gücü onun sistemli və effektiv siyasi aktor olmasına şərait yaratmışdır: "Eyni zamanda, 44 günlük Vətən müharibəsində əldə edilən Qələbə partiyanın fəaliyyətinə əlavə təkan verərək dövlətin güclənməsinə və ordunun modernləşdirilməsinə töhfə vermişdir. Bu faktorlar YAP-ın siyasi sistemdəki rolunu daha da gücləndirib və ölkənin inkişafında strateji mövqeyini möhkəmləndirib. Gələcəkdə YAP-ın strateji istiqamətləri Böyük Qayıdış proqramının icrası, Qarabağ və Şərqi Zəngəzurda yeni inkişaf modelinin tətbiqi, sosial rifahın yüksəldilməsi, iqtisadi islahatlar və rəqəmsal idarəetmənin genişləndirilməsi kimi sahələri əhatə edəcək. Həmçinin çoxvektorlu xarici siyasətin davam etdirilməsi, regional güc mərkəzi kimi mövqeyin möhkəmləndirilməsi və təhlükəsizlik strategiyalarının yenilənməsi də partiyanın gələcək prioritetləri arasında olacaq.

Ümumilikdə, YAP-ın 33 illik fəaliyyəti ölkədə siyasi sabitlik və dövlətçilik modelinin inkişafında əsas rol oynayıb və partiyanın gələcək strategiyası Azərbaycanın sosial-iqtisadi inkişafı və regional mövqeyinin güclənməsi baxımından mühüm əhəmiyyət kəsb edir".