"Konstitusiya dövlətin siyasi sabitliyinin və hüquqi dayanıqlığının əsas sütunudur" - POLİTOLOQ RƏY BİLDİRDİ

"12 Noyabr – Konstitusiya Günü Azərbaycanın dövlətçilik tarixində müstəsna əhəmiyyətə malikdir. 1995-ci ildə qəbul olunan bu sənəd müstəqil dövlətimizin hüquqi, siyasi və institusional əsaslarını müəyyən etdi. Konstitusiya həm dövlətin idarəetmə modelini, həm də vətəndaşların hüquq və azadlıqlarını təmin edən ali hüquqi çərçivədir". Bu sözləri SİA-ya açıqlamasında politoloq Tofiq Abbasov deyib.

Onun sözlərinə görə, Azərbaycan Konstitusiyası təkcə qanunlar toplusu deyil, həm də milli suverenliyin, siyasi müstəqilliyin və xalq iradəsinin ifadəsidir. Bu sənədin qəbul edilməsi ilə Azərbaycan hüquqi dövlət quruculuğuna, demokratik prinsiplərin möhkəmlənməsinə və idarəetmənin şəffaf mexanizmlərlə tənzimlənməsinə doğru mühüm addım atdı: "Konstitusiya 1995-ci ildən bu günə qədər bir neçə dəfə yenilənib və bu dəyişikliklər cəmiyyətin inkişaf dinamikasına və dövlətin qarşısında duran yeni çağırışlara uyğunlaşdırılıb. Xüsusən son islahatlar idarəetmə sisteminin çevikliyini, səmərəliliyini və hesabatlılığını artırmaq məqsədi daşıyır. Prezidentlik institutu, parlamentin fəaliyyəti, yerli özünüidarəetmə və məhkəmə hakimiyyətinin müstəqilliyi kimi məsələlərdə balanslı hüquqi mexanizmlər formalaşdırılıb. Konstitusiyanın ən böyük üstünlüyü onun dövlət və vətəndaş arasında qarşılıqlı məsuliyyəti təmin etməsidir. Bu, müasir hüquqi dövlət modelinin əsas prinsipidir: dövlət vətəndaşların hüquqlarını qoruyur, vətəndaşlar isə dövlətin qanunlarına hörmət və sadiqlik göstərirlər. Bundan başqa, Konstitusiya ölkədə siyasi sabitliyin qorunmasında mühüm rol oynayıb. 1990-cı illərin əvvəllərində siyasi xaos və qeyri-sabitlik dövründən sonra qəbul edilən bu sənəd hüquqi və siyasi sistemdə nizam-intizam yaratdı. Bu gün Azərbaycanda dövlət idarəçiliyi məhz konstitusion prinsiplərə əsaslanır və bu da ölkənin iqtisadi inkişafına, sosial sabitliyinə və beynəlxalq nüfuzuna müsbət təsir göstərir.

Hazırda qlobal dəyişikliklər və regional reallıqlar fonunda politoloqlar hesab edirlər ki, Konstitusiyanın bəzi maddələrinin təkmilləşdirilməsi gələcək islahatlar baxımından labüddür. Məsələn, rəqəmsal dövlət idarəçiliyi, kibertəhlükəsizlik, informasiya hüququ və süni intellektin tənzimlənməsi kimi yeni sahələrdə hüquqi çərçivələrin yaradılması zərurəti yaranır. Bu baxımdan, Konstitusiyanın müasir çağırışlara cavab verəcək şəkildə inkişaf etdirilməsi zəruridir. “Konstitusiya yaşayan bir sənəddir - o, zamanla dəyişən cəmiyyətin tələblərinə uyğun olaraq yenilənməlidir.” Lakin bu dəyişikliklər yalnız dövlətin əsas ideoloji dayaqlarına - müstəqillik, ərazi bütövlüyü, demokratik dəyərlər və insan hüquqlarına - zərbə vurmadan həyata keçirilməlidir. 12 Noyabr Konstitusiya Günü yalnız bir bayram deyil, həm də Azərbaycanın dövlətçilik ənənələrinin, hüquqi düşüncəsinin və demokratik inkişaf yolunun təntənəsidir. Bu sənədin qorunması və gələcək nəsillərə ötürülməsi milli məsuliyyət və dövlətçilik şüurunun ayrılmaz hissəsidir".