Azərbaycan Texnologiya Universitetində (ATU) Zəfər Gününün 5 illiyinə həsr olunan fakültələrarası futzal birinciliyi təşkil olunub. Yarışda Qida mühəndisliyi (QM) fakültəsi, Avtomatika, telekommunikasiya və informatika (ATİ) fakültəsi, Yüngül sənaye mühəndisliyi və logistika (YSML) fakültəsi, İqtisadiyyat və idarəetmə (İİE) fakültəsinin komandaları, eləcə də ATU-nun əcnəbi tələbələrdən ibarət yığma komandası iştirak edib. Universitetdən SİA-nın bölgə müxbirinə verilən məlumata görə, püşkatmadan sonra baş tutan ilk yarışı ATU-nun rektoru Yaşar Ömərov, prorektorlar, dekanlar, kafedra müdirləri və digər rəhbər heyət izləyib. Bu oyunda YSML1 komandası ilə əcnəbi tələbələr komandası qarşılaşıb və oyun yerli tələbələrin qalibiyyəti ilə başa çatıb.
İkinci oyunda QM1 komandası ilə ATİ2 komandası mübarizə aparıb və bu oyun 3:2 hesabı ilə nəticələnib. Üçüncü görüşdə İE komandası ATİ1 komandası qarşı-qarşıya gəlib və ATİ1 komandasının xeyrinə yekunlaşıb. Dördüncü oyunda YSML komandası ilə QM2 komandası üz-üzə gəlib və gərgin mübarizə 2:1 hesabı ilə başa çatıb.
Qeyd edək ki, qalib komandalar sabah final uğrunda mübarizə aparacaqlar.