“Süni intellekt istər idarəetmədə, istərsə də digər sahələrdə məqsəd yox, vasitədir. Məqsəd isə süni intellektdən istifadə edərək vətəndaşların rifahına və inkişafına nail olmaqdır”. SİA xəbər verir ki, bu sözləri çıxışı zamanı Azərbaycan Respublikası Prezident Yanında Vətəndaşlara Xidmət və Sosial İnnovasiyalar üzrə Dövlət Agentliyinin sədri Ülvi Mehdiyev deyib.
O bildirib ki, dünya üzrə aparılan sonuncu hesabatda süni intellekt tipli texnologiyalar nəticəsində dünyada 90 milyondan çox iş yerinin ləğvi və 170 milyondan çox yeni iş yerlərinin yaradılacağı qeyd olunub: “Təbii ki, yeni iş yerlərinin açılması sevindirici haldır. Lakin ləğv olunan iş yerləri ilə müqayisədə yeni yarananlar müvafiq bacarıqlar tələb edəcək. Azərbaycan da bu sahədə zamanında lazımi addımları atıb. Bütün bunlar göstərir ki, Azərbaycan dövlət olaraq yeni çağırışlara hazırdır və bu istiqamətdə islahatlar həyata keçirilir”.