Almaniyanın müdafiə naziri Boris Pistorius Bundesver üçün əvvəlcədən nəzərdə tutulandan daha çox “F-35” qırıcısının alınmasını planlaşdırır. SİA “Zeit” qəzetinə istinadla xəbər verir ki, ABŞ-ın “Lockheed Martin” şirkətinə artıq sifariş verilmiş 35 ədəd “F-35” döyüş təyyarəsindən əlavə daha 15 qırıcının da alınması nəzərdə tutulur. Həmin təyyarələrin ümumi dəyərinin 2,5 milyard avro olacağı bildirilir.
Hökumət bu ilin iyulunda əlavə sifariş planlarını təkzib etsə də, müdafiə büdcəsinin sonradan artırılması yeni silah alışına imkan yaradıb. “F-35” qırıcıları 1989-cu ildən xidmətdə olan 85 ədəd “Tornado” döyüş təyyarəsini əvəzləyəcək. Bu təyyarələr Almaniyanın nüvə paylaşımı proqramı çərçivəsində ABŞ-a məxsus atom bombalarını daşımaq və atmaq qabiliyyətinə malik olacaq.
Hazırda NATO-nun “Steadfast Noon” adlı hərbi təlimində Alman Hərbi Hava Qüvvələri hələlik köhnə “Tornado”larla iştirak edir. “F-35”lər isə Niderland kimi digər NATO ölkələrində istifadəyə verilib və bu təlimə ilk dəfə cəlb olunub.