2025-ci ilin son rübündə Dubay Tokio və Londonla yanaşı dünyanın ən populyar üç qlobal turizm istiqamətləri arasında yerini təmin edərək, beynəlxalq turistlərin sayına görə dünyada ən yüksək göstəricilərindən birini nümayiş etdirəcək. Bunu “Amadeus” tərəfindən idarə olunan “ForwardKeys” analitik şirkətin son proqnozu təsdiq edir. SİA xarici mətbuata istinadla xəbər verir ki, əvvəlcədən rezervasiyalara əsaslanan hesabat ötən ilin eyni dövrü ilə müqayisədə Dubaya beynəlxalq səfərlərin 6 faiz artdığını göstərir. Bu da şəhərin qlobal turizm, istirahət və biznes mərkəzi kimi mövqeyini gücləndirir.
“ForwardKeys” qeyd edib ki, Dubay dünya üzrə səyahətçilərin artan payını cəlb etməkdə davam edir. Bu ilin son üç ayında dünyada gözlənilən beynəlxalq turist səfərlərinin təxminən 2,2 faizi onun payına düşür.
Təhlil göstərir ki, Hindistan və Böyük Britaniya Dubayın ən böyük satış bazarları olaraq qalır, Çin isə əhəmiyyətli artım yaşayıb. Rezervasiyalarda illik 34 faiz artım qeydə alıb və şəhərin ən çox ziyarət edilən ilk onluğuna qayıdıb.
Almaniya da 9 faiz artım nümayiş etdirib ki, bu da Dubayın həm Avropa, həm də Asiya bazarlarında artan turist cəlbediciliyini əks etdirir.
Tələbatın kəskin artması ənənəvi olaraq Dubaya ən çox turist cəlb edən qış turizm mövsümü ilə üst-üstə düşür. Şəhərin inkişaf etmiş infrastrukturu, müxtəlif əyləncələr və dünya səviyyəli tədbirləri onun aparıcı qlobal turizm məkanı kimi nüfuzunu möhkəmləndirməkdə davam edir.
Dubay İqtisadiyyatı və Turizm Departamentinin məlumatına görə, 2024-cü ilin eyni dövründəki 10,62 milyon ilə müqayisədə Dubaya 2025-ci ilin ilk yeddi ayında 11,17 milyon beynəlxalq turist səfər edib, bu isə illik 5 faiz artım deməkdir.
Analitiklər deyirlər ki, şəhərin ardıcıl inkişafı təkcə onun dayanıqlılığını və cəlbediciliyini deyil, həm də Dubayın innovasiyalar, mədəniyyət və dünya səviyyəli qonaqpərvərliyi özündə birləşdirən birinci dərəcəli turizm məkanı kimi göstərməkdə davamlı uğurunu əks etdirir.