...Finlandiya prezidenti Alexander Stubb bəyan edib ki, qitədəki Amerika qoşunlarının sayı azalsa belə, Birləşmiş Ştatlar əsas hərbi texnikanı Avropada saxlamalıdır.
SİA xəbər verir ki, bu barədə o, Nyu-Yorka səfəri zamanı POLITICO-ya müsahibəsində bildirib.
Onun sözlərinə görə, qoşunların və texnikanın Hind-Sakit okean regionuna mümkün yenidən bölüşdürülməsi ilə bağlı müzakirələr başa düşüləndir, lakin Avropa strateji baxımdan mühüm və Vaşinqton üçün “çox faydalı” olaraq qalır.
...Mən əminəm ki, azalmalar olacaq, lakin onların nə qədər əhəmiyyətli olacağını hələ bilmirəm, - Stubb qeyd edib. Finlandiya lideri hesab edir ki, NATO müttəfiqləri üçün ən vacibi Avropada “əsas elementləri”, o cümlədən təyyarədaşıyan gəmiləri və radarları saxlamaqdır.
Hazırda qitədə 70-90 min Amerika əsgəri yerləşdirilib ki, bu da Rusiyanın Ukraynaya genişmiqyaslı müdaxiləsindən sonra artıb.
Finlandiyanın Rusiya ilə sərhədi 1300 kilometrdən çox uzanır.
Stubb təsdiqləyib ki, o, Ukraynadakı cəbhədəki vəziyyəti ABŞ prezidenti Donald Trampla müzakirə edib və bu təmaslar, ekspertlərin fikrincə, Amerika prezidentinin ritorikasının dəyişməsinə təsir edib.
Stubb Trampın Ukraynanın bütün itirilmiş əraziləri geri ala biləcəyi ilə bağlı son açıqlamalarını “dönüş nöqtəsi” adlandırıb.
Finlandiya prezidenti vurğulayıb ki, Trampın rəhbərliyi altında Avropa və ABŞ arasında münasibətlər indi 2016-cı ildən daha yaxşıdır və Vaşinqton və Kiyev arasında dialoq “açıq və dürüst” olaraq qalır.
Rusiya haqqında danışan Stubb qeyd edib ki, ölkə iqtisadiyyatı ciddi təzyiq altındadır: ehtiyatlar tükənib, inflyasiya və faiz dərəcələri 20 faizi keçib, artım sıfıra yaxındır. ...Rusiya artıq müharibənin bədəlini ödəyir, - deyən o, əlavə edib ki, atəşkəsə nail olmaq NATO-nun birliyini və qəti mövqeyini nümayiş etdirməyi tələb edir.
Əli Babayev