...Rusiyada yanacaqdoldurma məntəqələri kütləvi şəkildə bağlanır. Bu azalma neft emalı zavodlarında hasilat həcminin azalması ilə bağlıdır.
SİA xəbər verir ki, bu barədə Ukrayna Xarici Kəşfiyyat Xidmətinin saytında məlumat verilib.
Məlumdur ki, iki ay ərzində Rusiya Federasiyasında yanacaqdoldurma məntəqələrinin sayı 360 ədəd və ya 2,6 faiz azalıb.
Statistikaya görə, Rusiyada hər 50 yanacaqdoldurma məntəqəsindən biri benzin satışını dayandırıb.
Ən çox zərər görən müstəqil yanacaqdoldurma məntəqələri – onların sayı 4,1 faiz azalıb, şaquli inteqrasiya olunmuş neft şirkətlərinə məxsus yanacaqdoldurma məntəqələri arasında isə azalma cəmi 0,8 faiz olub.
...Yerli yanacaq qıtlığı şəraitində fəaliyyətini davam etdirən bəzi şəbəkələr bir müştəriyə 10-20 litr benzin satışına məhdudiyyətlər qoymağa və ya müvəqqəti olaraq yalnız dizel yanacağı satmağa məcbur olub, - deyə kəşfiyyat xidməti məlumat yayıb.
Ən böyük çətinliklər 220-dən çox yanacaqdoldurma məntəqəsinin və ya bütün regionun 14,2 faizinin yanacaq satışını dayandırdığı Cənub Federal Dairəsində müşahidə olunur.
Rostov vilayətində, Mari Eldə və Yəhudi Muxtar Vilayətində yanacaqdoldurma məntəqələrinin sayı 12-14 faiz azalıb.
Moskva yanacaq böhranından əziyyət çəkib, Krım isə ən pis qıtlığı yaşayır...
Yanacaq böhranı Moskvaya, Moskva və Leninqrad vilayətlərinə də çatıb. Rusiyanın paytaxtında “Lukoyl” bəzi yanacaqdoldurma məntəqələrində benzinin bankalarda satışını qadağan edib.
Bununla belə, yanacaqla bağlı ən kəskin vəziyyət müvəqqəti işğal olunmuş Krım və Sevastopolda müşahidə olunur, yanacaqdoldurma məntəqələrinin təxminən yarısı benzin satışını dayandırıb.
Yarımadanın işğal administrasiyasının rəhbəri Sergey Aksyonov sakinlərdən “səbirli olmalarını” istəyib və qıtlığı “obyektiv səbəblər” və “Rusiya neft emalı zavodlarında hasilat həcminin azalması” ilə əlaqələndirib.
Xarici Kəşfiyyat Xidməti Rusiyada yanacaq qıtlığının daha da pisləşəcəyini proqnozlaşdırır, çünki neft emalı zavodları və neft anbarlarının əksəriyyəti Rusiyanın qərbində cəmləşib. Xatırladaq ki, Ukrayna pilotsuz təyyarələrinin neftayırma zavodlarına hücumu Rusiyada yanacaq çatışmazlığına səbəb olub.
Populyar benzin növləri AI 92 və AI 95 Rusiya yanacaqdoldurma məntəqələrində çox vaxt mövcud olmur.
Bu problemlər şaquli inteqrasiya olunmuş neft şirkətlərinin tərkibinə daxil olmayan və emalın aşağı salınması və yüksək faiz dərəcələri səbəbindən benzin almaqda çətinlik çəkən özəl yanacaqdoldurma məntəqələrində xüsusilə kəskindir. Neftayırma zavodlarının atəşə tutulması bəzi günlərdə Rusiyada neft emalının demək olar ki, beşdə birini azaltdı və əsas limanlardan ixracı azaldıb.
Ukrayna bununla da Kremlin döyüş maşınına hücum etməyə və Rusiya diktatoru Vladimir Putini sülh danışıqlarına məcbur etməyə çalışır.
Əli Babayev