SİA xəbər verir ki, Bloomberg-in məlumatına görə, BMT-nin növbəti baş katibi ilk dəfə qadın ola bilər.
Məqalədə deyilir: "BMT-yə rəhbərlik edən doqquz nəfərin hamısı kişilərdir. Dəyişikliklərə çağırışlar getdikcə güclənir". Agentlik bildirib ki, sentyabrda qəbul edilmiş qətnamə BMT üzvlərini baş katib vəzifəsinə namizədləri seçərkən qadınları "ciddi şəkildə nəzərə almağa" çağırır.
Məqalədə bildirilir ki, Yeni Zelandiyanın keçmiş baş naziri Casinda Ardern bu vəzifəyə mümkün namizədlər arasındadır. Arderndən başqa, daha üç qadın BMT-nin potensial Baş katibi ola bilər: Barbados Baş naziri Mia Mottli, BMT-nin keçmiş İnsan Haqları Komissarı Mişel Baçelet və BMT Baş katibinin müavini Əminə Məhəmməd.
BMT-nin Baş katibi Təhlükəsizlik Şurasının tövsiyəsi ilə Baş Assambleya tərəfindən təyin edilir. Təhlükəsizlik Şurası namizədləri əvvəlcədən seçir və təklif olunan istənilən namizədə veto qoya bilər.
Texniki baxımdan, bir şəxsin işləyə biləcəyi beş illik müddətlərin sayı ilə bağlı heç bir məhdudiyyət yoxdur, lakin heç kim Baş Katib olaraq iki müddətdən artıq işləməyib. Təşkilatın hazırkı, doqquzuncu rəhbəri Antonio Quterreşdir. O, vəzifəsinin icrasına 2017-ci il yanvarın 1-dən başlayıb.
Əli Babayev