...100 yaşdan yuxarı yaponların sayı rekord həddə - 100.000-ə yaxınlaşdı.
SİA xəbər verir ki, bu barədə Yaponiyanın NHK telekanalı Yaponiya Səhiyyə Nazirliyinin məlumatlarına istinadən məlumat yayıb.
Nazirlik 2025-ci il sentyabrın 1-nə olan məlumatları təqdim edib: "Baza Rezident Reyestrinə əsasən, Yaponiyada yaşayan 100 yaş və yuxarı insanların sayı keçən illə müqayisədə 4644 nəfər artaraq 99763 nəfər təşkil edib".
Bu rəqəm 1970-ci ildən bəri ardıcıl 55 il ərzində qeydə alınan ən yüksək rəqəmdir.
Yüzilliklər arasında ən çox (88 faiz) qadınlardır - 87 784 nəfər.
Yayılan məlumatlara görə, Yaponiyanın ən yaşlı insanı Nara prefekturasının Yamatokoriyama şəhərində yaşayan 114 yaşlı Şiqeko Kaqavadır.
Ən yaşlı kişi Şizuoka prefekturasının İvata şəhərində yaşayan 111 yaşlı Mizuno Kiyoşidir.
Hər 100 min sakinə düşən 100 və daha yuxarı yaşlı Yaponiya sakinlərinin ən çox sayı Şimane, Koçi və Tottori prefekturalarındadır.
2024-cü ildə Yaponiya 40-cı dəfə qadınlar arasında gözlənilən ömür uzunluğuna görə dünya rekordunu müəyyənləşdirdi — ölkənin Səhiyyə Nazirliyinin məlumatına görə, yapon qadınlarının orta ömür uzunluğu 87,13 il təşkil edib.
Kişilər üçün bu rəqəm 2023-cü ildən dəyişməyərək 81,09 yaşa çatıb.
Yapon kişilər orta ömür uzunluğuna görə İsveç, İsveçrə və Norveç sakinlərini geridə qoyaraq altıncı yerdə qərarlaşıblar.
Nazlı Almuradova