2008-ci il dekabrın 12-də Azərbaycanda və regionda ilk dəfə qaraciyər transplantasiyası həyata keçirilib. O vaxtdan sonra 2 minədək xəstə üzərində orqan transplantasiyası əməliyyatı icra edən komanda Mərkəzi Gömrük Hospitalında fəaliyyət göstərir.
Hospitalın Cərrahiyyə və Orqan transplantasiyası şöbəsinin transplantoloqu, tibb üzrə fəlsəfə doktoru Mircəlal Kazımi və ümumi cərrah, transplantoloq Kamran Beydullayev həm böyüklərə, həm də uşaqlara qaraciyər və böyrək transplantasiyası əməliyyatlarını uğurla həyata keçirirlər. Əməliyyatdan əvvəl və sonrakı dövrlərdə cərrahlarla yanaşı, xəstələrə ixtisaslaşmış qastroenteroloq, hepatoloq, nefroloq və eyni zamanda uşaq hepatoloqu, uşaq nefroloqu tərəfindən mütəxəssis xidməti göstərilir.
Xəstə uşaqlar üzrə kifayət qədər təcrübəsi olan anestezioloq və reanimatoloqlardan ibarət komanda kiçik yaş qrupundan olan uşaqlara da transplantoloji xidmət göstərir. Həmin komanda tərəfindən 6 aylıq körpəyə qaraciyər transplantasiyası, 4 yaşlı uşağa isə böyrək transplantasiyası əməliyyatları uğurla həyata keçirilib. Həmin xidmət uğurla davam etdirilir. Qürurverici haldır ki, həmin komanda eyni seansda 6 yaşlı uşaq üzərində açıq ürək əməliyyatı və canlı orqanizmdən qaraciyər transplantasiyası əməliyyatını dünyada ilk dəfə olaraq aparıb.
Ölkəmizdə ilk dəfə olaraq canlı orqanizmdən qaraciyər transplantasiyası zamanı donor əməliyyatı laparoskopik üsulla Gömrük Hospitalında yerinə yetirilib.
2025-ci ildə Azərbaycanda və Cənubi Qafqazda ilk dəfə olaraq Mərkəzi Gömrük Hospitalında Orqan Transplantasiyası şöbəsinin transplantoloqu Mircəlal Kazımi və onun peşəkar komandası tərəfindən qaraciyər sirrozundan əziyyət çəkən xəstəyə meyit donordan qaraciyər köçürülməsi əməliyyatı uğurla aparılıb. Həmçinin Azərbaycanda və Cənubi Qafqazda ilk dəfə Mərkəzi Gömrük Hospitalında meyit donordan böyrək çatışmazlığından əziyyət çəkən xəstəyə böyrək transplantasiyası əməliyyatı da uğurla icra olunub.