“Faliyyətin uğurla davam etdirilməsi üçün əsas şərtlərdən biri fərdin və ya təşkilatın fəaliyyət göstərdiyi sahə üzrə peşəkar bilik və praktiki bacarıqlara malik olmasıdır”. Bu sözləri SİA-ya açıqlamasında modelyer Şəlalə Maqsudova deyib.
Şəlalə Maqsudova sözlərinə belə davam edib: “Əks halda, mövcud resursların düzgün idarə olunmaması, proseslərin səmərəsiz təşkili və bazar tələblərinə adekvat cavab verilməməsi səbəbindən uğursuzluq, hətta iflas halları qaçılmaz olur. İxtisaslaşma prinsipi burada mühüm rol oynayır: hər bir fərd və ya müəssisə yalnız öz kompetensiya dairəsində fəaliyyət göstərdiyi zaman, həm məhsuldarlıq, həm də iqtisadi gəlirlilik səviyyəsi yüksəlir. Bu yanaşma, həmçinin risklərin azaldılmasına, uzunmüddətli dayanıqlılığın təmin edilməsinə və rəqabət qabiliyyətinin artırılmasına xidmət edir. Nəticə etibarilə, fərdi bacarıqlara uyğun fəaliyyət istiqaməti seçmək, yalnız qısa müddətli qazanc əldə etməyə deyil, həm də davamlı inkişaf strategiyasının formalaşmasına imkan yaradır.
Düşünürəm ki, hər kəs bacardığı sahə üzrə irəliləsə bu həyatda çox gözəl uğur qazanmaq olar”.
Ayşən Vəli