Alimlər aşkar ediblər ki, evlərimizin və avtomobillərimizin içindəki hava ağciyərlərə dərindən nüfuz edə bilən mikroplastiklərin əsas mənbəyi ola bilər.
SİA xəbər verir ki, PLOS One-da dərc olunan Tuluza Universitetinin araşdırmasına görə, böyüklər hər gün diametri 10 mikrometrdən az olan 68 000-ə qədər mikroplastik hissəcikləri nəfəs alır - əvvəllər düşünüldüyündən yüz dəfə çox.
Müəlliflər mikroplastiklərin tərkibini ilk dəfə olaraq təkcə evlərdə deyil, həm də avtomobillərin içərisində real sürücülük şəraitində ölçmüşlər. Aşkar edilmiş hissəciklərin 90 faizindən çoxu 10 mikrondan az idi, yəni ağciyərlərin alveolalarına çata biləcək qədər kiçik idi.
Avtomobillərin havasında mikroplastiklərin konsentrasiyası hər kubmetrdə 2238 hissəcikə, mənzillərdə orta hesabla 528-ə çatıb.
Analiz üçün Raman spektroskopiyasından istifadə edilib ki, bu da plastik fraqmentlərin ölçüsünü və tərkibini dəqiq müəyyən etməyə imkan verir.
Tədqiqat təsdiq etdi ki, mikroplastiklər təkcə hər yerdə deyil, həm də bədəndə toplana bilər: inhalyasiya edilmiş hissəciklər zəhərli əlavələr buraxa, qan dövranına nüfuz edə və iltihaba, immun reaksiyalara və toxumaların zədələnməsinə səbəb ola bilər.
Elm adamları qapalı mikroplastik çirklənmənin ən çox qiymətləndirilməmiş risklərdən biri olduğunu vurğulayırlar. Mikroplastiklər əvvəllər kişi spermasında və qadın follikulyar mayesində tapılmışdı - reproduktiv funksiya ilə birbaşa əlaqəli maddələr.
Nazlı Almuradova