"Milli komandanın gələcəyi üçün ümidverici göstəricidir" - MÜTƏXƏSSİS ŞƏRH ETDİ

“Budapeştdə keçirilən dünya çempionatı Azərbaycan cüdosu üçün olduqca önəmli və nəticələr baxımından düşündürücü bir turnir oldu. Bu mötəbər yarış bir daha göstərdi ki, milli komandamızın texniki və taktiki hazırlığı üzərində sistemli şəkildə ciddi işlər görülür. Xüsusilə gənc idmançılarımızın çıxışı qənaətbəxş hesab edilə bilər. Onlar bu səviyyədə ilk təcrübələrinə baxmayaraq, bir sıra güclü rəqiblərlə inamla mübarizə apararaq öz potensiallarını nümayiş etdirdilər. Bu, milli komandanın gələcəyi üçün ümidverici göstəricidir". Bu sözləri SİA-ya açıqlamasında cüdo üzrə mütəxəssis Tərlan Həsənov deyib.

Onun sözlərinə görə, turnirin yekunlarını təhlil edərkən bəzi problemlərin də üzə çıxdığını etiraf etməliyik. Belə ki, bəzi cüdoçularımız döyüş zamanı psixoloji gərginlik qarşısında istədikləri performansı sərgiləyə bilmədilər. Əldə olunmayan nəticələrin arxasında məhz bu amilin – psixoloji dayanıqlığın zəifliyinin durduğunu müşahidə etdik: "Bu isə bizə onu göstərdi ki, təkcə texniki və fiziki hazırlıqla kifayətlənmək olmaz – idmançıların psixoloji hazırlığı da eyni dərəcədə önəm daşıyır. Bu səbəbdən qarşıdakı dövrdə, xüsusilə Avropa çempionatı və "Paris 2024" Olimpiadasına hazırlıq mərhələsində psixoloji hazırlıq aspektinə xüsusi önəm veriləcək. Biz artıq bu istiqamətdə mütəxəssislərlə işbirliyinə başlamışıq. Məqsədimiz idmançılarımızın yalnız fiziki güclərini deyil, eyni zamanda mənəvi və emosional dözümlülüyünü də artırmaqdır. Onlar yalnız döyüş texnikasında deyil, həm də stresə tab gətirməkdə, özünəinam və qərarvermə sürətində də inkişaf etməlidirlər.

Ümumilikdə isə dünya çempionatında əldə olunan nəticələr komandamız üçün mühüm təcrübə və ciddi motivasiya mənbəyi oldu. Hər bir yarış – istər uğurlu, istərsə də uğursuz nəticələrlə başa çatsın – bizim üçün bir dərsdir. Bu yarışdan çıxarılan nəticələr əsasında təlim prosesində yeni yanaşmalar tətbiq olunacaq, zəif nöqtələr üzərində daha dərindən işlənəcək. Əminliklə deyə bilərəm ki, bu təcrübə gələcək yarışlarda, xüsusilə də Olimpiya səhnəsində daha uğurlu çıxışlar üçün möhkəm zəmin yaradacaq”.