"Azərbaycanın suverenliyi təkcə hüquqi sənədlərdə deyil,..." - MÖVQE BİLDİRİLDİ

"28 May – Müstəqillik Günü, Azərbaycan tarixində milli kimliyin və dövlətçilik ənənələrinin bərpası baxımından müstəsna əhəmiyyət daşıyır". Bu sözləri SİA-ya açıqlamasında politoloq Tural İsmayılov deyib.

Onun sözlərinə görə, bu gün, 1918-ci ildə Azərbaycan Xalq Cümhuriyyətinin yaradılması ilə xalqımızın müstəqil yaşamaq iradəsini dünyaya bəyan etdiyi gündür: "XX əsrin əvvəllərində yaradılan Cümhuriyyət, Şərqdə ilk demokratik respublika kimi tarixə düşdü. Lakin Cümhuriyyətin ömrü qısa olsa da, onun ideyaları xalqın yaddaşında əbədi yaşadı. SSRİ-nin dağılması ilə yenidən müstəqilliyə qovuşan Azərbaycan, ilk illərdə siyasi və iqtisadi xaosla üzləşdi. Məhz bu mərhələdə Ulu Öndər Heydər Əliyevin hakimiyyətə qayıdışı, ölkənin xilası ilə nəticələndi. Heydər Əliyev, müstəqil dövlət quruculuğunun təməl prinsiplərini müəyyənləşdirdi və sabitlik yaratdı. Onun milli maraqlara əsaslanan siyasəti, Azərbaycanın beynəlxalq nüfuzunu artırdı. Əsası qoyulan neft strategiyası, ölkənin iqtisadi müstəqilliyini təmin etdi. Ulu Öndərin siyasi kursu, bu gün Prezident İlham Əliyev tərəfindən uğurla davam etdirilir. İlham Əliyevin rəhbərliyi ilə Azərbaycan, regional liderə çevrilib. 2020-ci ildə torpaqların azad olunması, bu siyasətin real nəticəsi oldu. Müasir Azərbaycan, həm iqtisadi, həm də siyasi cəhətdən suverenliyini qoruyan və inkişaf etdirən bir dövlətdir. Dövlət başçısı, qlobal təhdidlər fonunda milli maraqları önə çəkərək rasional və çevik qərarlar verir. Zəngəzur dəhlizi kimi layihələr, Azərbaycanın geosiyasi əhəmiyyətini daha da artırır. 28 May, bu gün artıq təkcə bir tarix deyil, həm də güclü dövlət modelinin rəmzidir. Azərbaycan xalqı, dövlət müstəqilliyinin qorunması və möhkəmləndirilməsi üçün həmrəy şəkildə birləşir. Milli ruhun yaşadılması və gələcək nəsillərə ötürülməsi baxımından da bu gün, ideoloji məna daşıyır. Uğurlu liderlik modeli, dövlətin sabitliyi və inkişafının əsas təminatıdır. Azərbaycanın suverenliyi, artıq təkcə hüquqi sənədlərdə deyil, real güc və iradədə öz əksini tapır".