“P1 Kultur” radio proqramının əməkdaşı isveçli jurnalist Emma Enqström "G20" filminin efirə çıxması ilə əlaqədar amerikalı aktrisa Viola Devis ilə təşkil edilmiş onlayn müsahibədə iştirak edib. Devis filmdə qaradərili ABŞ Prezidenti rolunu oynayır.
Lakin müsahibə gözlənilmədən yarımçıq kəsilib. Buna səbəb Enqströmün kino sənayesində irqi və gender müxtəlifliyi ilə bağlı sual verməsi olub. SİA xəbər verir ki, müsahibədən əvvəl filmin PR şöbəsi jurnalisti siyasi mövzulardan çəkinməyə çağırıb. Buna baxmayaraq, Enqström bildirib ki, filmin özü açıq-aşkar siyasi xarakter daşıyır və qadınların, eləcə də fərqli etnik mənşəyə sahib insanların siyasətdəki rolunu gündəmə gətirir.
Jurnalist Devisdən Hollivudda müxtəlifliklə bağlı vəziyyətə dair fikirlərini soruşduqda, aktrisa bu suala cavab verməyib. PR xidmətin nümayəndəsi dərhal müdaxilə edərək müsahibəni bitirib. Həmçinin, filmin rejissoru Patrisiya Riggen ilə planlaşdırılan görüş də ləğv edilib.
Enqströmün sözlərinə görə, bu hadisə ABŞ kino sənayesində bu cür mövzuların nə qədər həssas və gərgin olduğunu əks etdirir. Hazırda ABŞ-da Disney də daxil olmaqla bir sıra böyük media şirkətlərinin müxtəliflik təşəbbüslərinin ayrı-seçkilik prinsipini pozub-pozmadığı ilə bağlı araşdırmalar aparılır.
Jurnalist, həm filmlə, həm də onun real istehsal konteksti ilə bağlı vacib suallar verməsinə imkan yaradılmadığı üçün məyusluğunu ifadə edib.