Trampın açıqlaması maraq doğurub..?

4 Aprel 2025 18:28 (UTC+04:00)

Ukrayna prezidenti Vladimir Zelenski və Rusiya lideri Vladimir Putin Ukraynada atəşkəs sazişi bağlamağa hazırdırlar. Artıq tərəflər arasında danışıqlarda müəyyən irəliləyişlər var.

SİA-nın məlumatına görə, bu barədə ABŞ Prezidenti Donald Tramp Vaşinqtondan Mayamiyə uçan təyyarənin göyərtəsində jurnalistlərə açıqlama verib.

Onun sözlərinə görə, Ukraynadakı müharibə ilə bağlı tərəflər arasında danışıqlarda artıq nəzərəçarpacaq dəyişikliklər var. Eyni zamanda Tramp Avropanı tənqid edərək, onun Kremllə münasibətlərdə irəliləyişə nail ola bilmədiyini deyib.

O vurğulayıb ki, dialoqun hazırkı vəziyyəti ümidvericidir.

Tramp prezident Zelenskiyə istinad edərək, “O, razılaşmaya hazırdır” deyib.

ABŞ prezidenti Vladimir Zelenski ilə “bir müddət əvvəl” danışdığını da açıqlayıb.

…Və düşünürəm ki, Putin razılığa gəlməyə hazırdır.

Bunu da Tramp bildirib.

Rusiya nümayəndəsi Kirill Dmitrievin ABŞ-a səfərini şərh etməsini istəyəndə Tramp konkret şəxsləri müzakirə etmədiyini deyib.

Əli Babayev