Nizami kinoteatrında "Tağıyev - Çar" bədii filminin təqdimatı keçirilir. SİA xəbər verir ki, film Azərbaycan tarixində dərin iz qoymuş xeyriyyəçi Hacı Zeynalabdin Tağıyevin həyatına həsr olunan filmin 2-ci bölümüdür.
Bu gün sizə 2-ci bölümü – “TAĞIYEV: ÇAR” adlı filmi təqdim edəcəyik. Filmdə XIX əsrin sonu Bakı və regionda baş verən mühüm tarixi hadisələrə toxunulur.
Ümumilikdə film layihəsinin çəkilişi səkkiz ay ərzində ərsəyə gəlib. 76 fərqli məkanda kadrlar lentə alınıb, 300-dən çox dekorasiya qurulub, yüzlərlə rekvizit, tarixi kostyumlar hazırlanıb. Layihəyə yerlilərlə yanaşı xaricdən dəvət olunmuş aktyorlar, peşəkar texniki mütəxəssislər də cəlb olunub. Bu fakt isə layihənin beynəlxalq səviyyəli olduğunu göstərir.
Layihənin ilk ideyasının yarandığı gündən ilk təqdimatının keçirildiyi günə qədər 2500-dən çox insan bu layihənin uğurlu alınması üçün çalışıb.
Layihə Hacı Zeynalabdin Tağıyevin neft sənayesindəki uğurları, təhsilə verdiyi əhəmiyyət və xeyriyyəçilik fəaliyyətlərini tamaşaçılara çatdırır. Xüsusilə onun Şərqdə ilk dünyəvi qızlar məktəbini açaraq qadınların təhsilə çıxışını təmin etməsi, Tağıyevin xalqına göstərdiyi ən böyük xidmətlərdən biri kimi vurğulanır.
Xüsusilə, bu layihə tariximizi və dəyərlərimizi geniş auditoriyaya yüksək səviyyədə təqdim edən Bakı Media Mərkəzinin prezidenti Arzu xanım Əliyevanın təşəbbüsü ilə ərsəyə gəlib.
Film Heydər Əliyev Fondu, Mədəniyyət Nazirliyi və ARKA-nın dəstəyi, Neqsol Holding, Kapital Bank, Bakcell və Norm şirkətlərinin sponsorluğu ilə Bakı Media Mərkəzi tərəfindən istehsal olunub.