"Düşünürəm ki, İranla Azərbaycan münasibətləri artıq konstruktiv məcrada inkişaf etməkdədir. Azərbaycan səfirliyinin yeni ünvanda fəaliyyətə başlamasından sonra İranın yeni prezidenti Pezişkiyan, ümumiyyətlə İranla dünya ölkələri arasında, həmçinin Azərbaycan da daxil olmaqla region ölkələri arasında münasibətlərin inkişaf etdirilməsilə bağlı maraq ifadə edib. Ayrıca olaraq Azərbaycan dilindən sıx-sıx istifadə etməsi hesab edirəm ki, bunların hər biri ayrı-ayrılıqda pozitiv mənada düşündürən məqamlardır. İran prezidentinin müşavirinin Azərbaycan prezidenti ilə görüşü və müzakirə mühiti göstərir ki, Azərbaycanla İran arasında münasibətlərdə kifayət qədər inkişafa meyilli məqamlar mövcuddur”. Bu sözləri SİA-ya açıqlamasında politoloq Elşad Mirbəşiroğlu deyib.
Onun sözlərinə görə, nəzərə almaq lazımdır ki, bu iki ölkə çox mühüm bir regionda, böyük sərhədə malik olan qonşu ölkələrdir: “Birgə iştirak etdikləri çox mühüm strateji əhəmiyyətli layihələr mövcuddur. Nəzərə almaq lazımdır ki, Azərbaycanla İran arasında əhəmiyyətli nəqliyyat-kommunikasiya infrastrukturları qurulmaqdadır və Azərbaycan bu istiqamətdə xüsusi inkişaf edir. Rəşd-Astara dəmir yolu xətti, iki ölkə arasındakı əməkdaşlığın çox mühüm istiqamətini təşkil edir. Təbii ki, qonşu ölkələr arasında iqtisadi əməkdaşlığın şaxələndirilməsi, inkişaf etdirilməsi həm regional təhlükəsizlik baxımından, həm də hər iki ölkənin iqtisadi göstəricilərinin yüksəlməsi baxımından çox əhəmiyyətlidir”.
Politoloq qeyd edib ki, İran tərəfində də biz hesab edirik ki, bu istiqamətdə müsbət impulslar görməkdəyik: “Azərbaycanın xarici siyasətində prinsipləri həmişə çox aydın olub. Biz dünya dövlətlərinin hamısı ilə konstruktiv, bərabər hüquqluluq əsasında, bir-birilərinin daxili işlərinə qarışmamaq prinsiplərinin gözlənilməsi ilə münasibətlərin və əməkdaşlığın qurulmasında hər zaman maraqlı olmuşuq. Hər zaman tərəfdaşlarımızla səmimi olmuşuq və təşəbbüslərlə çıxış etmişik. Sözümüzə uyğun addımlar atmışıq, mövqe sərgiləmişik. Bu baxımdan sözsüz ki, Azərbaycanla bağlı heç bir problem yoxdur. Əgər İranda daxil olmaqla qarşı tərəfin istəyi, təşəbbüskarlığı olacaqsa, düşünürəm ki, münasibətlər kifayət qədər rəvan inkişaf edəcəkdir."