Azərbaycanda Avropa Yenidənqurma və İnkişaf Bankının (EBRD) maliyyə dəstəyi ilə "yaşıl enerji" layihələrinin tətbiqi genişlənib. SİA xəbər verir ki, bunu maliyyə naziri Sahil Babayev EBRD-nin Davamlı İnfrastruktur Qrupunun idarəedici direktoru Harri Boyd-Karpenterin rəhbərlik etdiyi nümayəndə heyəti ilə görüşdə deyib.
Onun sözlərinə görə, Azərbaycan EBRD-lə əlaqələrin inkişafına böyük əhəmiyyət verir: "Ölkəmizdə bankın maliyyə dəstəyi ilə həm dövlət, həm də özəl sektorda bir sıra layihələr həyata keçirilib, iqtisadiyyatın şaxələndirilməsi, ictimai infrastrukturun inkişafı və "yaşıl enerji" layihələrinin tətbiqi genişlənib".
Bundan başqa, görüşdə hazırda icra olunan və icrası planlaşdırılan layihələr üzrə də fikir mübadiləsi aparılıb.
H.Karpenter qeyd edib ki, EBRD Azərbaycan üzrə 2025-2030-cu illəri əhatə edən ölkə tərəfdaşlıq strategiyasını yeni təsdiq edib və bu strategiya Azərbaycanın milli inkişaf məqsədlərinə uyğundur.
Azərbaycanla uzunmüddətli və səmərəli tərəfdaşlığını qeyd edən EBRD rəsmisi bankın bundan sonra da Azərbaycan iqtisadiyyatını dəstəkləməkdə davam etmək niyyətini, bu baxımdan ölkənin iqtisadi potensialının əlaqələrin genişlənməsinə əlavə imkanlar yaratdığını qeyd edib.