"Bakı əhalisi normadan artıq olan bir şəhərdir. İnsanlarımız iş məqsədilə rayonlardan Bakıya köç ediblər. 30 il 20% torpaqlarımız işğal altında olduğu müddətdə məcburi köçkünlərimiz də zərurətdən dolayı Bakıya yerləşiblər". Bu sözləri SİA-ya açıqlamasında sosial və mənəvi məsələlər üzrə ekspert Ramal Əliyev deyib.
O bildirib ki, buna baxmayaraq, Bakı dünyanın ən təhlükəsiz şəhərlərindən biridir: "Müxtəlif xalqların bir araya gəldiyi Bakıda sakinlər, həqiqətən də, qarşılıqlı hörmət şəraitində yaşayırlar. Amma buna baxmayaraq, bəzən neqativ hallara və cinayətlərə rast gəlinir. Bu, ümumiyyətlə, bəşəri bir problemdir. İnsanların çox olduğu yerdə cinayətkarlıq və dələduzluq qaçılmaz olur.
Belə neqativ hallardan biri də son zamanlar Bakıda özünü qəsdən maşınların altına atan dələduzların sayının artmasıdır.
Kapitalizm dövrüdür. Bəzi sakinlər, pul qazanmaq üçün müxtəlif asan və zəhməti az olan yollar axtarırlar. Bu, anlaşılandır, amma bu yolda Allahdan qorxmaq, halal və harama diqqət etmək vacibdir. İnsan pulunu vicdanla qazanmalıdır. Başqasını şərləməklə, iftira atmaqla, tələyə salmaqla pul qazanmaq vicdansızlıqdır. Belə puldan nə insan özünə, nə də ailəsinə fayda götürməməlidir. Zahirən qazanc hesab olunan bu pulun həm dünyada, həm də Allah qarşısında cavabı vardır. Biz azərbaycanlıyıq, müsəlmanıq, qalib xalqıq, minlərlə şəhid və qazisi olan bir xalqıq. Başqasını şərləyib onu bədbəxt edərək öz xoşbəxtliyini bunun üzərində qurmaq bizə yaraşmaz.Təsəvvür edin ki, hər bir minik sahibi evindən səhər ruzi qazanmaq üçün çıxır və plansız, gözləmədiyi halda birdən göz görə-görə kimsə özünü maşının önünə və ya arxasına bilərəkdən tullayır və şərlənmə ilə üzləşir. Nə yaxşı ki, şəhərimizdə demək olar ki, bütün ərazilərdə müşahidə kameraları mövcuddur. Bu dələduzların çox vaxt istəkləri baş tutmur. Əksinə, özünü maşın altına atan şəxs məsuliyyətə cəlb edilir. Kameralar olmasaydı belə, dələduzluğa məruz qalan sürücünün öz günahsızlığını isbatlaması çox çətin olacaqdı".
"Mən özüm şəxsən bir neçə il öncə Xırdalan şəhərində analoji hadisə ilə üzləşmişəm. Kamera sayəsində öz günahsızlığımı isbatlaya bilmişəm. Düşünürəm ki, belə şəxslərin belə alçaq metoda əl atmasının səbəbləri Allahdan qorxmamalarıdır. Əgər belə insanlar Allahdan qorxsalar, etdikləri əməlin günah və vicdansızlıq olduğunu dərk etsələr, təbii ki, maddi ehtiyacları olsa belə, buna əl atmazlar. Maddi ehtiyac, ümumiyyətlə, insanı belə alçaq işə sövq etməməlidir. İnsan öz insanlığını istənilən maddi vəziyyətdə qorumaq məcburiyyətindədir. Belə fikrə düşən şəxslərə bu addımı atmamışdan öncə Allahın onları gördüyünü, cinayət məcəlləsiylə özlərinin hüquqi məsuliyyətə cəlb olunacaqlarını və başqa bir ailənin bədbəxtçiliyinə səbəb ola biləcək addım atdıqlarının fərqində olub bunu etməsinlər" - deyə o, əlavə edib.