"İran bizim əzəli və əbədi qonşumuzdur. Qonşularla münasibətimizin yaxşı olması bizim xarici siyasət doktrinasının tərkib hissəsidir. Yəni Azərbaycan qonşularla dinc yanaşı yaşama prinsipinə bəyan edir. Bu prinsip beynəlxalq hüquq normalarının tənzimlənməsi çərçivəsində maraqlıdır. Bu baxımdan İran və Azərbaycan arasında münasibətin yaxşı olması, hər iki dövlətin maraq dairəsindədir. Düzdür, arabir İran daxilində xoşagəlməz bəyanatlar səslənir. Yəni bəzi siyasi dairələr İran dövləti adına Azərbaycan əleyhinə bəyanatlar versə belə, Azərbaycan tərəfi çalışır ki, bu münasibəti yoluna qoysun və qarşılıqlı bəyanatları cavablandırmaqla yanaşı konstruktiv mövqedən çıxış etmək üçün addımlar atılır". Bu sözləri SİA-ya açıqlamasında politoloq Azad Məsiyev deyib.
Onun sözlərinə görə, İran-Azərbaycan münasibətlərinin yaxşı olması bölgədə stabilliyin yaranması deməkdir: "Xüsusilə də İran indiki dövrdə Qərbin sanksiyalarının təsiri, həmçinin Amerikanın təhdidi altında olduğu bir zamanda İran-Azərbaycan münasibətlərinin yaxşı olması İranında marağındadır. Eyni zamanda şimal-cənub dəmir yolunun infrastrukturunun işə düşməsi, həyata keçirilməsi, hesab edirəm ki, İranın və Azərbaycanında maraqlarına uyğundur. Yəni qarşılıqlı münasibətlərin yaxşı olması hər iki dövlətin xalqının maraqlarındadır. Bu baxımdan hər iki dövlət başçılarının bir-birini təbrik etməsi, eyni zamanda diplomatik kanallarla rəsmilərin görüşməsi, fikir mübadiləsi etməsi dövlətlərarası münasibətlərin yaxşılaşmasına gətirib çıxara bilər".
Politoloq qeyd edib ki, eyni zamanda Azərbaycan tərəfi İranla 3+3 formatı çərçivəsində əməkdaşlıqda da maraqlıdır: "Yəni bu platforma da Azərbaycan-İran münasibətlərinin yaxşılaşmasına gətirib çıxaracaq addımlar ola bilər. Ümumilikdə İran bizim əbədi və əzəli qonşumuzdur. İranda bizim 50 milyona yaxın soydaşlarımız yaşayır, onlarla dini yaxınlıqlarımız var. Bu baxımdan hesab edirəm ki, bu cür münasibətlərin diplomatik kanallarla yüklənməsi həm iqtisadi, həm də siyasi münasibətlərin yaxşılaşmasına gətirib çıxara bilər ki, bundan da hər iki xalq bəhrələnə bilər.
Fikrimcə, bu münasibət Azərbaycan tərəfi tək İran deyil, bütün qonşularla münasibətlərinin yaxşı olmasında maraqlıdır. Hətta ərazisini 30 il işğalda saxlayan Ermənistanı da sülh sazişinə dəvət edir. Yəni Azərbaycan Ermənistanla da münasibətlərin yaxşı olmasına maraqlıdır. Hesab edirəm ki, Azərbaycan-İran münasibətləri tək iki dövlət arasında deyil, ümumilikdə region baxımından da əlaqələrin güclənməsinə səbəb ola bilər. Eyni zamanda Rusiyadan İran qaz kəmərinin çəkilməsi nəzərdə tutulur. Həmçinin İran-Azərbaycan münasibətləri İran-Rusiya münasibətlərinin də yaxşılaşmasına gətirib çıxara bilər. Azərbaycan-İran münasibətlərinin yaxşı olması Türkiyə-İran münasibətlərinin yaxşı olmasına da gətirib çıxara bilər ki, bu da bölgənin strateji məsələsidir. Hesab edirəm ki, dövlət başçılarının qarşılıqlı anlaşması və qarşılıqlı hörmətlə davranması iki dövlət arasında dostluq əməkdaşlığına gətirib çıxara bilər".