Finlandiya Piyada Əleyhinə Minaların Qadağan edilməsi Haqqında Ottava konvensiyasından çıxmağa hazırlaşır. SİA Finlandiya mediasına istinadla xəbər verir ki, bu barədə hökumətin saytında yerləşdirilmiş bəyanatda qeyd olunub.
“Hazırda Finlandiyaya qarşı birbaşa hərbi təhdid yoxdur. Ottava sazişinin qüvvədən düşməsi təhlükəsizlik sahəsində dəyişikliklərə müxtəlif üsullarla hazırlaşmaq imkanı verir”, - deyə ölkənin Baş naziri Petteri Orpo vurğulayıb.
Finlandiya baş nazirinin sözlərinə görə, Helsinkinin xarici siyasətinin əsas hədəfləri “Finlandiyanın müstəqilliyinin və ərazi bütövlüyünün təmin edilməsi, ölkənin hərbi münaqişələrə cəlb edilməsinin qarşısının alınması, finlərin təhlükəsizliyi və rifahının təmin edilməsidir”.
Bundan başqa Finlandiya Dövlət Şurası 2029-cü ilə kimi müdafiə xərclərinin ÜDM-in üç faizinə çatdırılması barədə qərar qəbul edib.
Qeyd edək ki, 163 ölkənin qoşulduğu Ottava konvensiyası 1997-ci il dekabrın 3-də imzalanıb, 1999-cu il martın 1-də isə qüvvəyə minib.