2025-ci ildə orta gündəlik qlobal neft istehlakı rekord həddə - 106,1 milyon barelə çatacaq. Bu proqnozu Səudiyyə Ərəbistanının “Saudi Aramco” neft şirkətinin rəhbəri Əmin Nasser verib.
SİA-nın məlumatına görə, onun sözlərini TASS sitat gətirib.
Beləliklə, o, bu növ xammala qlobal tələbatın 2025-ci ildə gündə 1,3 milyon barel artacağını gözləyir.
Nasserin sözlərinə görə, rekord artımın əsas sürücüsü Asiya-Sakit okean regionu (APR) ölkələri olacaq.
O xatırladıb ki, dünyada neft istehlakında artım bir neçə ildir ki, qeydə alınıb. 2024-cü ildə orta gündəlik göstərici 1 milyon barel artaraq 104,8 milyon barelə çatıb.
... Biz onun 2025-ci ildə böyüməyə davam edəcəyini gözləyirik.
Nasser, həmçinin əlavə edib ki, “Saudi Aramco” qlobal enerji bazarında riskləri sabitləşdirmək üçün kifayət qədər sərbəst neft hasilatı gücünə malikdir.
Hazırda onların həcmi gündə üç milyon bareldən çoxdur. "Aramco bütün ssenarilərə hazırdır" deyə konsernin rəhbəri yekunlaşdırıb.
Bundan əvvəl Rusiya baş nazirinin müavini Aleksandr Novak qlobal neft tələbi ilə bağlı oxşar proqnoz vermişdi.
Onun proqnozlarına görə, 2025-ci ildə qlobal xammal istehlakı sutkada 1-1,5 milyon barel artaraq 104,4 milyona çatacaq.
Ümumilikdə, onun gözləntilərinə görə, karbohidrogenlər növbəti 20 il ərzində qlobal enerji istehlakının artımı məsələsində əsas rol oynayacaq.
Beynəlxalq Enerji Agentliyi (IEA) isə əks fikirdədir. Təşkilatın rəhbəri Fatih Birol bildirib ki, neft də daxil olmaqla, qalıq yanacaqlara qlobal tələbat 2030-cu ilə qədər pik həddə çatacaq. Bundan sonra onlara qlobal maraq durmadan azalmağa başlayacaq.
Əli Babayev