Naxçıvan Dövlət Universitetinin (NDU) Elmi Kitabxanasında türkiyəli alim, Türkiyə Radio-Televiziya Qurumunun müxbiri Aysel Sadak İltaşın Ulu Öndər Heydər Əliyevə həsr olunmuş “İnsan ürəyi ilə Heydər Baba” kitabının təqdimat mərasimi keçirilib. Naxçıvan Dövlət Universitetinin Media və ictimaiyyətlə əlaqələr bölməsindən SİA-ya bildirilib ki, tədbirdə universitetin rektoru Elbrus İsayev bu nəşrin Ümummilli Liderin həyat və fəaliyyətini dərin insani keyfiyyətləri ilə birlikdə təqdim edən dəyərli əsər olduğunu deyib. Qeyd edilib ki, kitabda Ulu Öndərin dövlətçilik prinsipləri, onun müdrik siyasəti və xalqına olan sonsuz sevgisi müxtəlif rakurslardan əks olunub.
Rektor bildirib ki, kitabda tanınmış alimlərin, ictimai-siyasi xadimlərin və görkəmli ziyalıların Heydər Əliyev haqqında düşüncələri, onunla bağlı xatirələri toplanıb. Nəşr, həmçinin Ulu Öndərin ideyalarının bu gün də aktuallığını qoruyub saxladığını və yeni nəsillər üçün örnək olduğunu nümayiş etdirir.
Vurğulanıb ki, kitabın NDU-nun kitabxana fondlarında yer alması qürurvericidir və bu nəşr tələbələr üçün dəyərli elmi mənbə, Ümummilli Lider Heydər Əliyevin zəngin irsi ilə bağlı tədqiqat aparan gənclər üçün etibarlı istinad qaynağı rolunu oynayacaq.
Azərbaycan Milli Elmlər Akademiyası Naxçıvan Bölməsinin sədri, akademik İsmayıl Hacıyev kitabın Ulu Öndər Heydər Əliyevin şəxsiyyətini, onun yüksək insani keyfiyyətlərini və xalqımıza verdiyi dəyəri geniş şəkildə işıqlandırdığını bildirib. Akademik qeyd edib ki, bu nəşr Heydər Əliyevin şəxsiyyətini dərindən öyrənmək və onunla bağlı tədqiqatlar aparmaq istəyənlər üçün əvəzsiz mənbədir. Kitabda dahi liderin həyatına və irsinə dair dəyərli fikirlər, xatirələr və təhlillər toplanıb.
Sonra İsmayıl Hacıyev müəllifə kitab hədiyyə edib.
Universitetin “Beynəlxalq münasibətlər” kafedrasının dosenti, Naxçıvan Muxtar Respublikası Ali Məclisinin deputatı Emin Şıxəliyev kitabın Heydər Əliyevin çoxşaxəli həyat və fəaliyyətindən bəhs edən dəyərli əsər olduğunu qeyd edib.
Naxçıvan Muxtar Respublikası Dövlət Müdafiə Komitəsinin əks-kəşfiyyat şöbəsinin sabiq rəisi, Heydər Əliyevin səlahiyyətli hərbi nümayəndəsi Urfulla Qurbanov çıxışında Ulu Öndərin Naxçıvana gəldiyi dövrdən bəhs edib, ölkəmizə və xalqına olan sonsuz sevgisini vurğulayıb və onunla bağlı xatirələrini bölüşüb. Urfulla Qurbanov Heydər Əliyevin liderliyinin çətin günlərdə xalq üçün böyük dayaq olduğunu xüsusi qeyd edib. “Sirab” Açıq Səhmdar Cəmiyyəti İdarə Heyətinin sədri Namiq Novruzov Heydər Əliyevin ölkəmizin inkişafında və sənaye sahəsindəki müstəsna rolunu vurğulayıb, Ulu Öndərin rəhbərliyi ilə Azərbaycanın iqtisadiyyatında böyük irəliləyişlər əldə edildiyini qeyd edib.
Türkiyənin Naxçıvandakı baş konsulu Asip Kaya "İnsan ürəyi ilə Heydər Baba" kitabının müəllifini təbrik edib, onun Ulu Öndər Heydər Əliyevin irsini dərindən araşdıraraq dəyərli bir əsər ərsəyə gətirdiyini vurğulayıb.
Sonra müəllif göstərilən dəyər və diqqətə görə minnətdarlığını bildirib, universitetin Elmi Kitabxanasına "İnsan ürəyi ilə Heydər Baba" kitablarını hədiyyə edib.
Tədbirin sonunda rektor Elbrus İsayev Aysel Sadak İltaşa Ümummilli Lider Heydər Əliyevin 100 illiyi münasibətilə NDU tərəfindən nəşr olunan “Elmi əsərlər” xüsusi buraxılışını, həmçinin “Həyat yolu 1993-2003” və “Naxçıvan: dörd fəsildə” kitablarını təqdim edib.