UEFA Çempionlar Liqasının yeni formatı meydana gəldiyi ilk gündən müzakirələrə səbəb olub. Bəzi futbolsevərlər bu formatı bəyənsə də bir çox futbolsevər bu yenilikdən narazıdır. Məsələ ilə bağlı futbol mütəxəssisi Aslan Kərimov SİA-ya açıqlama verib.
Aslan Kərimov yeni formatın top klublara çətinlik yaratdığını vurğulayıb: ‘’Bu formatın keçirilməsi ilk günlərdən top klubların narazılığına səbəb olub. Səbəb isə bundan ibarətdir ki, klublar ölkə çempionatında da 3 titul uğrunda mübarizə aparır və eyni zamanda top klubların oyunçuları öz milli komandalarının da əsas oyunçularıdır. Belə olduqda oyunçular dayanmadan oynamalı olur və zədələnmə halları artır. Klopp və Qvardiola da bununla bağlı öz narazılıqlarını dilə gətiriblər’’.
Mütəxəssis inkişafda olan klublar üçün bu formatın üstünlüklərindən bəhs edib: ‘’Bu format inkişaf etməkdə olan, top liqalarda olmayan klublar üçün faydalıdır. Yeni format ilə bu klublar daha çox oyun oynayaraq daha çox təcrübə toplaya bilir’’.
Aslan Kərimov yekun olaraq top klubların aşağı pillələrdə yerləşməsindən söz açıb: ‘’Artıq 8-likdə qərarlaşan klublar növbəti mərhələyə vəsiqə qazanır. Digər komandalar isə pley-off turu ilə növbəti mərhələni təmin edə bilir. Bu səbəbdən top klublar ölkə çempionatında çətin oyunlar olarsa Çempionlar Liqasında ilk 8-likdə qərarlaşmağa və ya pley-off turu ilə növbəti mərhələyə vəsiqə qazanmağa üstünlük verirlər’’. ‘’Real Madrid’’ ‘’Bavariya’’ kimi top klublar 8-liyi təmin edə bilməsələr belə pley-off turunun onlar üçün çətinlik yaradacağını düşünmürəm’’.
Ayaz Zeynalzadə