Yanvarın 12-də Rotterdamda silsilə üç partlayış baş verib.
SİA xəbər verir ki, bu barədə yerli polisə istinadən ANP agentliyi məlumat yayıb.
Hüquq-mühafizə orqanlarının məlumatına görə, partlayışlar yerli vaxtla 01:30-dan 02:30-a qədər bir saatlıq fasilələrlə şəhərin müxtəlif ərazilərində baş verib.
Tələfat olmasa da, ilkin məlumata görə, partlayışlar nəticəsində binalara maddi ziyan dəyib.
Rotterdam polisi araşdırma aparır, lakin hələ ki, həbs olunanlar yoxdur.
Ötən gün Çexiyanın Most şəhərindəki restoranlardan birində içərisində propan-butan qarışığı olan silindrin partlaması nəticəsində 8 nəfər xəsarət alıb, daha 30 nəfər təxliyə edilib. Çexiyanın Yanğın və Xilasetmə Xidməti X sosial şəbəkəsində bildirib ki, ilkin məlumata görə, partlayış qızdırıcının aşması nəticəsində baş verib. Daha sonra binada yanğın başlayıb.
Əli Babayev