Yeni il bayramında bir çox insan gəzməyə, həmçinin istirahətə rayonlara qatar vasitəsilə gedirlər. Bəs bununla əlaqədar olaraq bayramqabağı qatarların hərəkət rejimində hansısa dəyişikliklər olacaq?
ADY-nin Kommunikasiya departamentinin əməkdaşı Bəxtiyar Hacıyev SİA-ya açıqlamasında bildirib ki, ADY qarşıdan gələn bayram günlərində sərnişin tələbatını təmin etmək məqsədilə 30 dekabr – 5 yanvar tarixlərində rayonlararası (şəhərlərarası) istiqamətlərə əlavə reyslər təyin edib: "30 dekabrda Bakı-Qəbələ-Bakı marşrutu üzrə hər iki istiqamətdə qatar reysləri təşkil ediləcək. 31 dekabrda Bakıdan Qəbələyə, 2 yanvarda isə əks istiqamətdə əlavə reyslər təyin edilib. Həmçinin yanvarın 3-də hər iki istiqamətdə, yəni Bakıdan Qəbələyə və Qəbələdən Bakıya əlavə qatar hərəkətdə olacaq. 4 yanvarda qatar Bakıdan Qəbələyə, 5 yanvarda isə Qəbələdən Bakıya hərəkət edəcək.
Bayram günlərində Bakı-Ağstafa-Bakı marşrutu üzrə də əlavə reyslər təyin edilib. Sözügedən reyslər qeyri-iş günü elan edilmiş 30 dekabr – 5 yanvar tarixlərində hər gün olmaqla, həmçinin 28 və 29 dekabr tarixlərində Bakıda 09:15-də, Ağstafadan isə 17:00-da təşkil ediləcək. Bundan əlavə, sərnişinlər bu marşrutlar üzrə ənənəvi reyslərlə hər gün hər iki istiqamətdə səfər edə bilərlər".
Xeyrənsə Piriyeva