Yeni Azərbaycan Partiyası Sabunçu rayon təşkilatının təşkilatçılığı ilə “31 dekabr - Dünya Azərbaycanlılarının Həmrəyliyi Günü” münasibətilə “Həmrəyliymiz milli birliyimizdir: İlham Əliyev Dünya Azərbaycanlılarının lideridir!” mövzusunda bayram tədbiri keçirilib. SİA xəbər verir ki, tədbirdə əvvəlcə Ulu Öndər Heydər Əliyevin və Azərbaycanın ərazi bütövlüyü uğrunda canlarını qurban vermiş şəhidlərimizin əziz xatirəsi bir dəqiqəlik sükutla yad edilib. Sonra Azərbaycan Respublikasının Dövlət Himni səsləndirilib.
Tədbiri giriş sözü ilə açan Sabunçu Rayon İcra Hakimiyyətinin başçısı Adil Vəliyev qeyd edib ki, Heydər Əliyev yolunun Müzəffər davamçısı kimi Prezident İlham Əliyevin sosial-iqtisadi tərəqqiyə, ölkəmizin hərbi gücünün və müdafiə qabiliyyətinin yüksəlməsinə, beynəlxalq aləmdə mövqeyinin güclənməsinə, mili həmrəyliyin möhkəmlənməsinə yönəldilmiş uzaqgörən siyasəti Azərbaycanın haqq işinin Zəfərlə yekunlaşmasında həlledici rol oynamışdır. Artıq Azərbaycan dünyada inkişaf diyarı, multikultural dəyərlərin və tolerantlıq mühitinin hökm sürdüyü sabitlik adası, beynəlxalq dialoq və əməkdaşlıq məkanı, qalib və qüdrətli dövlət kimi tanınır.
Yeni Azərbaycan Partiyası Sabunçu rayon təşkilatının sədri Araz Xudadanov tədbir iştirakçılarını Dünya Azərbaycanlılarının Həmrəyliyi Günü münasibətilə təbrik edib. Bu günün tarixi önəmindən bəhs edən Araz Xudadanov xalqımızın həmrəyliyinin və birliyinin daim vacib olduğunu, dörd il öncə torpaqlarımızın işğaldan azad olunmasının Müzəffər Ali Baş Komandan, Prezident İlham Əliyevin rəhbərliyi altında məhz bu milli birlik və vəhdətin nəticəsində mümkün olduğunu söyləyib. Qeyd olunub ki, bu zəfər yalnız Azərbaycanın ərazi bütövlüyünün bərpa edilməsi deyil, həm də bütün azərbaycanlıların qürur mənbəyinə çevrildi. Cənab Prezidentin qətiyyəti, siyasi uzaqgörənliyi və beynəlxalq arenada apardığı diplomatik uğurları dünya azərbaycanlılarına güvən və birlik hissi bəxş edib. Tədbirin sonunda bir qrup YAP fəallarına Fəxri Fərman, diplom və yubiley hədiyyələri təqdim edilib.
Tədbir daha sonra bədii hissə ilə davam edib.
Sonda Yeni Azərbaycan Partiyasının Himni səsləndirilib.