Bakı Dövlət Universiteti (BDU) və Yeni Azərbaycan Partiyasının (YAP) Yasamal rayon təşkilatının birgə təşəbbüsü ilə “Ümummilli Lider Heydər Əliyev mühazirələri” layihəsi çərçivəsində Türk Ağsaqqalları Birliyinin sədri, Əməkdar elm xadimi, professor Sudeif İmamverdiyev ilə BDU tələbələrinin görüşü keçirilib. Universitetdən SİA-ya bildirilib ki, YAP Yasamal rayon təşkilatının sədri Bəxtiyar Nəbiyev müasir müstəqil Azərbaycan dövlətinin qurulması və inkişafının Ümummilli Lider Heydər Əliyevin adı ilə bağlı olduğunu qeyd edib. Vurğulayıb ki, Ulu Öndərin zəngin irsinin, azərbaycançılıq ideologiyasının tələbə və gənclərə aşılanması onların milli ruhda formalaşması üçün vacib addımlardan biridir. YAP tərəfindən bu istiqamətdə çoxşaxəli tədbirlər görülür, ölkənin ali təhsilinin flaqmanı olan Bakı Dövlət Universiteti də bu işə öz layiqli töhfəsini verir.
BDU rektorunun elm və təhsil üzrə müşaviri Aydın Kazımzadə çıxışında həm Ümummilli Liderin, həm də Prezident İlham Əliyevin BDU-ya göstərdiyi diqqət və qayğıdan danışıb.
Türk Ağsaqqalları Birliyinin sədri Sudeif İmamverdiyev məruzəsində Ümummilli Lider Heydər Əliyevin fəaliyyətində təhsil siyasətindən bəhs edib. O bildirib ki, bu siyasət ölkəmizin davamlı və dayanıqlı inkişafına xidmət edib: “Ulu Öndər 1969-1982-ci illərdə kadrların milliləşdirilməsi istiqamətində sistemli tədbirlər həyata keçirdi. Dövlət qurumlarında azərbaycanlı kadrlar irəli çəkildi, azərbaycanlı gənclər keçmiş SSRİ-nin nüfuzlu ali məktəblərində təhsil almağa göndərildi, ana dilimizə diqqət artırıldı, çoxlu təhsil müəssisələri açıldı, iqtisadiyyatımız inkişaf etdi. Bütün bunlar müstəqil dövlətin təməl daşları idi”.
Qeyd olunub ki, müstəqillik illərində Ulu Öndərin xilaskarlıq missiyası sayəsində Azərbaycanda siyasi və iqtisadi sabitlik yarandı.
“Ümummilli Liderin Azərbaycan xalqına ən böyük ərməğanı isə özündən sonra Prezident İlham Əliyev kimi siyasi varisini yetişdirməsidir. O siyasi varis ki, ata vəsiyyətini yerinə yetirərək, 30 illik erməni işğalına son qoydu, suverenliyimizi bərpa edərək, tarixi Qələbəni Azərbaycana yaşatdı”, - deyə Türk Ağsaqqalları Birliyinin sədri vurğulayıb.
Sonda tələbələrin mövzu ilə bağlı sualları cavablandırılıb.