...Dağıstanda aparılan yanacaqdoldurma məntəqələrində genişmiqyaslı yoxlamalar zamanı Mahaçqalada daha bir yanacaqdoldurma məntəqəsi yanıb.
SİA rus saytlarına istinadən xəbər verir ki, Fövqəladə Hallar Nazirliyindən verilən məlumata görə, yanğın Mirzəbəyov prospektində yerləşən yanacaqdoldurma məntəqəsində baş verib.
Yanğınsöndürənlər gələnə qədər yanğın artıq qaz nasoslarını və bir avtomobili bürüyüb.
...Yanğının 20 kvadratmetr sahədə lokallaşdırıldığı bildirilir. Hadisə nəticəsində xəsarət alan olmayıb. Hadisə yerində Rusiya Fövqəladə Hallar Nazirliyinin 26 mütəxəssisi və 7 texnikası işləyir.
Bu yaxınlarda bildirildi ki, Dağıstanda bir sıra partlayış və yanğınlardan sonra başlanmış yanacaqdoldurma məntəqələrində yoxlama zamanı auditorlar 17 mindən çox qanun pozuntusu aşkar ediblər.
Məlum olub ki, respublikada beş minə yaxın yanacaqdoldurma məntəqəsi yanğın və istehsalat təhlükəsizliyi qaydalarına əməl olunmadan fəaliyyət göstərir. Kadr çatışmazlığı və çoxsaylı qanun pozuntuları səbəbindən ötən ilin yayından etibarən Dağıstanda yanacaqdoldurma məntəqələrində bir neçə partlayış baş verib, nəticədə 48 nəfər ölüb, yüzdən çox insan yaralanıb.
Əli Babayev