Amerika Birləşmiş Ştatlarının Milli Aeronavtika və Kosmos İdarəsinin (NASA) “Juno” kosmik aparatı Yupiterin möhtəşəm görüntüsünü paylaşıb.
SİA xəbər verir ki, bu aparat 2016-cı ildə Yupiterin orbitinə daxil olduqdan etibarən planetin və peyklərinin ilk görüntülərini dünyaya təqdim etmişdi. Lakin, son göndərilən görüntülər əvvəlki fotolarla müqayisədə həqiqətən diqqətçəkəndir.
“Juno” 23 oktyabr 2024-də planetin ən yaxın nöqtəsinə çatdığı an əldə edilən məlumatlar Yupiterin səthindəki rəngarəng ləkələri nümayiş etdirir. NASA-nın “JunoCam” səhifəsində xam görüntü məlumatlarına giriş imkanı yaradılıb və izləyicilər bu görüntüləri emal edərək müxtəlif atmosferik xüsusiyyətləri nümayiş etdirə bilirlər. Həmçinin rəng təkmilləşdirmələri edərək, kollajlar yaradaraq və inkişaf etmiş rəng yeniləmə texnikaları ilə fotoları daha da cazibədar hala gətirə bilirlər.
İstifadəçilər tərəfindən paylaşılan bu son emal olunmuş görüntülər Yupiterin heyranedici atmosferini bir daha göz önünə sərir. “Juno”nun növbəti perijov nöqtəsi (Yupiterə ən yaxın nöqtə) isə 25 noyabrda baş tutacaq.