Pakistanda iki fərqli terror hücumunda 6 nəfər həlak olub, 5 nəfər isə yaralanıb.
SİA xəbər verir ki, Polis rəsmilərinin verdiyi məlumata görə, dünən Cənubi Vəziristan bölgəsində təhlükəsizlik qüvvələrini daşıyan bir maşının keçidi zamanı yol kənarına yerləşdirilmiş bomba partlayıb. Partlayışda polislərdən 4-ü həyatını itirib, 5-i isə yaralanıb. Terror aktını hələ heç bir qrup üzərinə götürməsə də, “Pakistan Talibanı” (TTP) son dövrdə bölgədə hücumlarını artırdığı ilə tanınır.
Digər tərəfdən, TTP-nin Xaybər Paxtunxva əyalətindəki Tira vadisi yaxınlığına atdığı bildirilən minaatan mərmisi yolun kənarına düşüb. Hücum zamanı iki məktəbli həyatını itirib.