2024-cü il 2 noyabr tarixində Azərbaycan Respublikası Atçılıq Federasiyasının təşkilatçılığı ilə milli atçılığın inkişafı naminə Azərbaycanda yorğa atların Respublika çempionatı keçiriləcək. Bu tədbir Binə Atçılıq Mərkəzinin cıdır meydanında baş tutacaq və Azərbaycanın müxtəlif bölgələrindən 50-dək yorğa atı öz gücünü sınamaq imkanı qazanacaq. SİA xəbər verir ki, çempionatda Azərbaycanın müxtəlif regionlarında doğulan yerli yorğa atları 8 müxtəlif kateqoriyada və məsafədə yarışacaqlar. Bu yarış eyni zamanda cıdır mövsümünün bağlanış günü ilə üst-üstə düşdüyü üçün atçılıq həvəskarlarının böyük marağına səbəb olub və çox sayda tamaşaçının iştirakı gözlənilir.
Yorğa çempionatı ilə yanaşı, cıdır mövsümünün bağlanışı ilə əlaqədar əlavə yarışlar da həmin gün keçiriləcəkdir. Bu yarışlar 4 qaçışdan ibarət olacaq və Qarabağ, Dilbaz və ingilis atlarının iştirakı ilə həyata keçiriləcək. Hər iki tədbirin qaliblərinə diplom, kubok və müxtəlif mükafatlar təqdim olunacaq.
Tədbir 2 noyabr 2024-cü il tarixində saat 11:00-dan etibarən başlayacaqdır.
Giriş sərbəstdir!