ABŞ Müdafiə Nazirliyi (Pentaqon) Şimali Koreyanın Rusiyaya dəstək üçün Ukraynaya qoşun göndərdiyinə dair iddiaları araşdırdığını açıqlayıb. SİA xarici KİV-ə istinadən xəbər verir ki, gündəlik mətbuat konfransında danışan Pentaqonun mətbuat katibi Briqada generalı Patrik Rayder Pxenyanın Rusiyaya kömək etmək üçün Ukraynaya qoşun yeritdiyinə dair iddialardan xəbərdar olduqlarını, lakin hələlik təsdiq edə bilmədiklərini bildirib.
İddiaları araşdırdıqlarını və məsələni yaxından təqib etməyə davam edəcəklərini ifadə edən Rayder deyib: "İddialar doğrudursa, bu, Rusiya ilə Şimali Koreya arasındakı əməkdaşlığın irəlilədiyini göstərir. Bu, həm də Rusiyanın içində olduğu dəhşətli vəziyyəti ortaya qoyur".
Ukrayna prezidenti Vladimir Zelenski Avropa İttifaqı (Aİ) liderləri ilə görüşdən sonra Brüsseldə jurnalistlərə bildirib ki, Rusiya döyüş meydanına təxminən 10 min Şimali Koreya əsgərini yerləşdirməyə hazırlaşır.